“Beşiktaş”da qarşıdan gələn növbədənkənar prezident seçkisi ilə bağlı yeni xəbərlər var.

"Football-plus.az" xəbər verir ki, daha öncə klub tərəfindən seçkinin dekabrın 17-də baş tutacağı açıqlanmışdı. Amma fanatlar üzündən bu tarix dəyişdirilib! Fanatların etirazı bitməyincə və hər matçda “istefa” təzahüratları davam edincə, rəhbərlik seçkinin vaxtını 2 həftə əvvələ çəkib. Yəni bu nəhəng camiə növbəti prezidentini cəmi bir ay sonra, konkret desək, dekabrın 3-də seçəcək. Bundan başqa, istefa verən hazırki başqan Ahmet Nur Çəbinin artıq namizədliyini irəli sürməyəcəyi, demək olar, dəqiqləşib. Düzdü, Çəbi hələ də susqunluğu qoruyur və bu məsələ ilə bağlı heç bir rəsmi açıqlama verməyib. Amma onun namizəd olmayacağını vitse-prezident Əmrə Kocadağın açıqlamalarından da anlamaq olar. Belə ki, “Qaziantep”ə qarşı son matçın ardından Kocadağ namizəd olacağına işarə verib. Halbuki onun daha öncə Ahmet Nur Çəbiyə rəqib olmaq istəmədiyi iddia edilmişdi. Bundan başqa, daha öncə 2 dəfə namizədliyini irəli sürən və hər dəfə də məğlub olan Sərdar Adalının da sürpriz şəkildə namizədliyini açıqlayacağı gözlənilir. Hələlik rəsmi şəkildə namizədliyin açıqlayan yeganə şəxs Hasan Aratdı. Bir məqam dəqiqdi ki, qarşıdakı seçkidə birdən artıq, yəni minimum iki namizəd olacaq.

Komandadaxili duruma gəlincə, bazar ertəsi “Qaziantep” üzərində qazanılan 2:0 hesablı inamlı qələbə camiəni sevindirsə də, itkilərin və zədəlilərin çoxluğu Burak Yılmazın başçılıq etdiyi məşqçilər korpusunu düşündür. Son oyunda müxtəlif səbəblər üzündən Amarti, Kolli, Masuaku, Umut Meraş, Tayfur Bingöl, Mərt Günok, Əmrəcan Uzunhan, Tayyip Talha Sabuç, Rozye və Abubakar komandaya yardım etmədi. Bu azmış kimi, Gezzal da 21-ci dəqiqədə sol ayaq əzələsini dartaraq əvəzləndi. Son vaxtlar zədələrdən heç cür qurtula bilməyən əlcəzairli vinger yenidən 3 həftəliyə sıradan çıxıb. Halbuki o, 4-cü turda “Sivaaspor”la oyunda 4,5 aylıq zədədən qayıdaraq sıraya dönmüşdü. Amma 58 gündən sonra yenidən zədələndi. Bu, onun “Beşiktaş” karyerasındakı ümumilikdə 14-cü zədəsidi! Onu da vurğulayaq ki, Abubakar son oyunu xəstəlik üzündən buraxmalı oldu. Qripə yoluxan və hərarəti qalxan kamerunlunun durumu hələ də yaxşılaşmayıb. “Qaziantep”lə oyunda onu əvəz edən Cenk Tosun ümidləri doğruldaraq mövsümdə ilk qolunu vurdu. Tosun bununla da superliqada 32-ci fərqli komandanın qapısına yol toparaq 2007/08-dən bəri bu göstəricidə öz məşqçisi Burak Yılmaza məxsus olan rekordu təkrarladı. Cenkin bazar günü “Antalyaspor”a qarşı səfər oyununda da start heyətində olacağı gözlənilir.