“Beşiktaş”da vəziyyət yenə gərgindi.

“Football-plus.az” xəbər verir ki, bu yay transfer dönəmində əzəli rəqiblərinin kölgəsində qalan İstanbul nəhəngi son dönəmlərdə Serxio Ramos və Anderson Talişka kimi ulduzlarla danışıqlar aparmaqla fanatlarını xeyli ümidləndirmşdi. Amma avqustun 22-də “Qartal” fanatlarının bütün ümidlərini məhv etdi. Belə ki, klubdan verilən rəsmi açıqlamada Ramos və Talişka ilə maddi məsələlərdə anlaşma əldə olunmadığı üçün danışıqların dayandırıldığı qeyd olundu. Məhz bu bəyanat camiədə aləmi bir-birinə vurdu. Fanatlar onsuz da “Pendikspor” bərabərliyi və zəif transfer siyasəti üzündən narazı olduqları başqan Ahmet Nur Çəbini sosial şəbəkələrdə yerdən-yerə vuraraq onun istefasını tələb etdilər. Bu arada Ramos üzündən bir yönəticinin istefa verdiyi məlum oldu. Daha öncə Duşan Tadiçin “Fənərbaxça”ya, Xəlil Dərvişoğlunun “Qalatasaray”a qismət olmasında günahkar elan olunan idman direktoru Ceyhun Kazancı istefa vermişdi. Bu dəfə isə vitse-prezident Sərah Çətinsaya istefasını Ahmet Nur Çəbiyə təqdim etdi. Amma budəfəki məsələ bir qədər fərqlidi. Türkiyə mətbuatının versiyasına inansaq, Talişka ilə Ramos iki il üçün “Beşiktaş”a ən yaxşı halda ümumilikdə 50 milyon avroya başa gələcəkdi. Bura həm təzminat, həm bonuslar, həm illik məvacib, həm də imza parası daxildi. Ona görə də bu məbləğin klubun büdcəsinə uyğun olmadığını düşünən rəhbərlik hər iki oyunçu ilə danışıqları dayandırmaq qərarına gəldi. Amma Sərhan Çətinsaya Ramos transferinin bütün xərclərini üzərinə götürübmüş! Hətta jurnalist Umut Ekenin iddiasına görə, Çətinsaya özü şəxsən İspaniyaya yollanıb və orda Ramos, eləcə də onun qardaşı ilə görüşərək danışıqlar aparıbıb. Bu yönətici məbləği əvvəlcə 20 milyon avrodan 16 milyon avroya, sonra da 16 milyon avrodan 13 milyon avroya endirməyə müvəffəq olubmuş. Bu pulun hamısını o, öz cibindən ödəməyə hazır imiş. Amma danışıqlar prosesi başa çatmaq üzrə olarkən və hətta Çətinsaya Ramosla birlikdə Türkiyəyə qayıtmağın planlarını cızarkən “Beşiktaş”ın hər iki futbolçu barədə yaydığı rəsmi bəyanat bütün fanatlar kimi onu da şoka saldı. Bu üzdən rəhbərliyin addımını anlamayan vitse-prezident istefa verdi. Amma Ahmet Nur Çəbi hələ ki onun istefasını qəbul etməyib. Hazırda digər yönəticilər Çətinsayanı fikrindən daşındırmağa çalışır.

Bu arada son hadisələrin ardından Hasan Arat “Beşiktaş” prezidentliyinə namizəd olduğunu açıqlayaraq Ahmet Nur Çəbini növbədənkənar seçki keçirməyə dəvət edib. O, indiki rəhbərliyin bundan sonra bir gün də olsun, bu vəzifədə qalmağa layiq olmadığını deyib və camiənin problemlərini həll etməyə hazır olduğunu bildirib. 64 yaşlı iş adamı daha öncə mərhum Süleyman Səbanın dönəmində “Beşiktaş”da yönətici kimi çalışıb. 1999-cu ildə o, prezidentliyə namizəd olsa da, Sərdar Bilgiliyə məğlub olmuşdu. O vaxtdan bəri çox da gündəmə gəlməyən Hasan Arat indi yenidən prezidentliyə namizədliyini açıqlayıb.

Qeyd edək ki, ötən ilin iyununda keçirilən seçkidə qalib gələn indiki başqan Ahmet Nur Çəbinin səlahiyyət müddəti 2025-də tamamlanacaq.