Tur o qədər də məhsuldar alınmadı.

4 qarşılaşma 1:0 hesabı ilə yekunlaşdı və bunların hamısında meydan sahibləri sevindi. Bu 4 komandadan biri açılış matçında “Baltika”nı evə əliboş yola salan “Rubin” oldu. Yüksəlişdə olan Kazan təmsilçisi son 5 turda 10 xal toplayıb və bunların 4-də qapısını toxunulmaz saxlayıb. Halbuki komanda ilk 8 turun hamısında qol buraxmışdı. “Baltika” isə hələ də bu mövsüm səfərdə xal toplamayan yeganə komandadı (7 oyun, 7 məğlubiyyət).

“Spartak” nala-mıxa vurmaqda davam edir. Qələbələr və məğlubiyyətlər bir-birini əvəz edir. Ötən tur “Nijni Novqorod”la ev oyununda qeydə alınan 2:0-lıq qələbədən sonra bu dəfə Moskva nəhəngi eyni hesabla səfərdə “Fakel”ə uduzdu. Düzdü, Voronejdə meydanın ot örtüyü çox bərbad vəziyyətdə idi. Amma necə deyərlər, şərtlər hər iki komanda üçün eyni idi. “Spartak” səfərdə ardıcıl 4-cü oyunda uduzdu. Bu, çempionat çərçivəsində klubun antirekordunun təkrarlanması deməkdi. Daha öncə “ağ-qırmızılar” yalnız 2004-də Nevio Skala ilə 4 səfər oyunundan xalsız ayrılmışdılar. Bundan başqa? komanda səfərdə ardıcıl 3-cü oyunda qol vura bilmədi və bununla daha bir antirekord təkrarlandı. Son uğursuzluğun ardından Gilyermo Abaskalın istefaya göndəriləcəyi gözlənilsə də, rəhbərlik hələ də tələsmək istəmir.

“Lokomotiv”in Rostovda xal qazanmağa gücü çatmadı. Mövsümün ən çox qol buraxan komandası olan “Rostov”un ardıcıl 2-ci tur qapısını toxunulmaz saxlaması diqqəti çəkdi. Valeri Karpinin kollektivinin sonuncu dəfə belə seriyası ötən mövsümün 7-8-ci turlarında olmuşdu. “Zenit”in yüksəlişi davam edir. Sankt-Peterburq nəhəngi “Axmat”la ev oyununda ilk yarının ortalarında hesabda geri düşsə də, hələ fasiləyə qədər 2 qol vuraraq əzmkar qələbə qazandı. “Zenit” çempionat çərçivəsində ardıcıl 20-ci oyunda qol vuraraq öz rekordunu təkrarladı. Komandanın daha öncə belə seriyası 2011/12 mövsümündə qeydə alınmışdı. Piterlilər həm də bu qələbə ilə liderlə xal fərqini 2-yə endirdi. Çünki turun mərkəzi oyununda ÇSKA ilə bacara bilməyən “Krasnodar”, nəhayət, mövsümdə ilk dəfə uduzdu. Komandanın çempionatdakı rekord – 18 oyunluq məğlubiyyətsiz seriyası beləcə başa çatmış oldu. ÇSKA-nın 2023-cü ildə evdə keçirdiyi 13 çempionat matçının heç birində uduzmadığını da bildirək (10 qələbə, 3 heç-heçə).

13-cü tur
Zenit – Axmat 2:1
Sergeyev, 32. Kassyerra, 37 – Konate, 24.
Zenit: Adamov, Yerakoviç, Rodriqao, Alip, Santos, Barrios, Vendel (Kruqovoy, 90+2), Klaudinyo (Du Keyruş, 65), Mantuan (Yeroxin, 90+2), Sergeyev (Mostovoy, 74), Kassyerra.
ÇSKA – Krasnodar 1:0
Çalov, 41.
ÇSKA: Akinfeyev, Kellven, Zdelar, Moyzes, Aqapov, Qayiç, Oblyakov, Mendes, Fayzullayev, Çalov (Kuçayev, 81), Zabolotnı.
Fakel – Spartak 2:0
Markov, 71-p. Maksimov, 83.
Spartak: Maksimenko, Denisov, Babiç, Duarte (Maslov, 80), Xluseviç, Prutsev (Çernov, 73), İqnatov (Martins, 66), Litvinov (Umyarov, 66), Zinkovski (Medina, 73), Bonqonda, Sobolev.
Rostov – Lokomotiv 1:0
Şetinin, 3.
Lokomotiv: Lantratov, Nenaxov (Samoşnikov, 56), Morozov, Fasson, Silyanov (Süleymanov, 67), Barinov, Mitay (Maridişvili, 83), Pinyaev (Mirançuk, 46), Tiknizyan, Qluşenkov, Dzyuba.
Krılya Sovetov – Orenburq 1:1
Qarre, 24 – Peres, 66.
Dinamo – Ural 2:1
Tyukavin, 42. Bitello, 61 – İşkov, 90+5.
Rubin – Baltika 1:0
Vada, 88.
Nijni Novqorod – Soçi 1:0
Kalinski, 38.
1. Krasnodar 13 8 4 1 21-8 28
2. Zenit 13 8 2 3 27-13 26
3. Krılya Sovetov 13 6 4 3 27-18 22
4. Dinamo 13 5 6 2 19-16 21
5. ÇSKA 13 5 6 2 23-17 21
6. Spartak 13 6 2 5 18-20 20
7. Lokomotiv 13 5 5 3 18-17 20
8. Nijni Novqorod 13 6 2 5 12-11 20
9. Rostov 13 4 4 5 21-24 16
10. Ural 13 4 4 5 14-20 16
11. Rubin 13 4 4 5 12-20 16
12. Fakel 13 4 3 6 11-15 15
13. Axmat 13 3 3 7 13-17 12
14. Orenburq 13 3 3 7 15-21 12
15. Baltika 13 3 2 8 12-19 11
16. Soçi 13 3 0 10 13-20 9
Bombardirlər: Kassyerra (Zenit) – 10, Çalov (ÇSKA) – 7, Kordoba, Spertsyan (hər ikisi “Krasnodar”) – 6.
Növbəti turun oyunları noyabrın 4-6-sı aralığında keçiriləcək: Krasnodar - Krılya Sovetov, ÇSKA – Nijni Novqorod, Lokomotiv – Spartak, Axmat – Fakel, Soçi – Dinamo, Baltika – Zenit, Ural – Rubin, Orenburq Rostov
Oyundan sonra
Sergey Semak, “Zenit”in baş məşqçisi: “Qol epizodlarının çox olmayacağını və matçın çətin keçəcəyini bilirdik. Çünki “Axmat” müdafiə olunmağı bacarır. İlk yarıda müdafiədə inamlı təsir bağışlamadıq. Bəxtimiz onda gətirdi ki, qol buraxandan dərhal sonra 2 top vurduq. İkinci hissədə oyunumuz daha yaxşı alındı. Baxmayaraq ki, fasilədən sonra qol vura bilmədik. Halbuki fərqi artırmaq üçün şanslarımız var idi. Layiqli şəkildə hesabımıza daha 3 xal yazdıq. “Zenit“ ötən mövsümlə müqayisədə zəifləyibmi? Bəli. Həm oyun, həm emosiya, həm də heyət baxımından geriləmişik. Bəzi əsas futbolçular ayrıldı. Ona görə də oyunumuzu tez-tez dəyişmək məcburiyyətində qalırıq. Hələ də özümüz üçün ən ideal sistemi tapmağa çalışırıq”.
Gilyermo Abaskal, “Spartak”ın baş məşqçisi: “Bura qələbə üçün gəlmişdik. Amma iki fərdi səhv bizə baha başa gəldi. İlk epizodda qırmızı vərəqə verildi və qapımıza penalti təyin olundu. İkinci epizodda daha diqqətli oynasaydıq, qol buraxmazdıq. Ot örtüyü bərbad idi. Bu da işimizi çətinləşdirdi. Yaxşı ki, heç olmasa, ciddi zədə alan futbolçumuz olmadı. Sadəcə, bu məğlubiyyəti qəbul edib irəli boylanmalıyıq. Düzdü, futbol qarda da, soyuqda da, istidə də oynanılır. Amma bu matçda konkret futbolu təhlil etmək çətindi. Çünki şou, tamaşa yox idi. “Fakel” belə meydanda özünü rahat hiss edir. Onlar hər oyunu bu cür meydanda keçirsələr, çempion olarlar! Promesin əzələsində ağrılar var. Amma tezliklə bizimlə birlikdə olacaq”.