“Bavariya”ya uduzan və apreldən bəri davam edən 23 oyunluq məğlubiyyətsiz seriyası qırılan “Qalatasaray” mövsümə yaxşı başlasa da, komanda daxilində müəyyən problemlər var.

"Football-plus.az" xəbər verir ki, daha dəqiq desək, bəzi futbolçular az şans qazanmasından narazıdı. Söhbət ilk növbədə Viktor Nelsson ilə Anxelinyodan gedir. Danimarkalı Nelsson, bilindiyi kimi, mövsümə əsas heyət üzvü kimi başlamışdı. İlk oyunlarda müdafiənin mərkəzində o və Əbdülkərim Bardakcı yer alırdı. Amma yayda “Sevilya”ya transferi son anda baş tutmayan bu futbolçu yeni müqaviləyə imza atmaq istəmədikdən və xüsusilə də Davinson Sançesin transferindən sonra əsas heyətdəki yerini itirdi. Bu ay yığma fasiləsi zamanı o, Danimarka mətbuatına təhdidvari açıqlamalar vermiş, oynamamasının səbəbini anlamadığını və durum belə davam edəcəyi halda klubdan ayrılacağını demişdi. Buna qədər Nelsson, heç olmasa, ikinci yarılarda meydana çıxırdı. Amma həmin qalmaqallı açıqlamadan sonra 25 yaşlı futbolçu həm “Beşiktaş”a, həm də “Bavariya”ya qarşı oyunları əvvəldən sona qədər ehtiyat oyunçular skamyasında keçirib. Onun hərəkətlərindən də belə başa düşmək olar ki, danimarkalı artıq “Qalatasaray”dan küsüb! “Bavariya” ilə matçdan öncə fanatlar onu alqışlamaq üçün tribunanın önünə çağırsa da, Nelsson buna heç bir reaksiya vermədi. Bundan başqa, istedadlı futbolçunun ehtiyatda qaldığı son iki qarşılaşmada oyunöncəsi isinmə hərəkətlərinə çıxmaması diqqətdən qaçmadı. Klubda oynamaması üzündən o, yığmadakı mövqeyini də itirib. Nelsson Danimarkanın son 4 matçının hamısını ehtiyatda keçirib. Okan Burukun bu problemi necə yoluna qoyacağı bilinmir. Amma belə davam etsə, Nelsson, çox güman, qışda komandanı tərk edəcək. Buruk bu mövzu ilə bağlı son açıqlamasında bunları demişdi:

Anxelinyoya gəlincə, yayda onun transferini Okan Buruk özü şəxsən tələb etmiş və bu futbolçu 1,5 milyon avroya “Leyptsiq”dən birilliyə icarəyə götürülmüşdü. Amma Anxelinyonun ümidləri doğrultduğunu söyləmək çətindi. O, ötən mövsümdən bəri komandanın ən zəif mövqeyi sayılan müdafiənin sol cinahına çarə ola bilməyib. Təsadüfi deyil ki, Buruk “Bavariya” kimi rəqiblə qarşılaşmada həmin mövqedə gənc və təcrübəsiz Kazımcan Karataşa güvəndi. Amma Kazımcan da zəif təsir bağışlayaraq buraxılan 3 qoldan ikisində səhvə yol verdi. Ümumiyyətlə, “Qalatasaray” bu mövsüm rəsmi matçlarda buraxdığı 17 qoldan 7-ni, yəni 41 faizini sol cinahdan buraxıb. Anxelinyo hələ ki 15 rəsmi oyuna çıxaraq komandaya 1 qol, 1 məhsuldar ötürməlik fayda verib. Onun müqaviləsində xüsusi maddə var. Belə ki, ispaniyalı futbolçu 20 rəsmi oyuna çıxacağı halda “Qalatasaray” “Leyptsiq”ə əlavə 6 milyon avro ödəyərək onu məcburi transfer etməli olacaq! Anxelinyo hələlik oyunu ilə bu pula layiq olduğunu sübut edə bilməyib. Okan Buruk da onunla bağlı tərəddüd içindədi. Amma daha 5 oyuna çıxacağı təqdirdə bu futbolçu klubun daimi üzvünə çevriləcək. Ona görə də Burukun qarşıdakı oyunlarda ona şans verib-verməyəcəyi bilinmir. Onu da bildirək ki, İstanbul nəhəngi 26 yaşlı futbolçunu alandan sonra gələcəkdə onu 9 milyon avrodan baha məbləğə satacağı təqdirdə həmin pulun 20 faizi “Leyptsiq”ə çatacaq.