“Nə üçün oynamadığımı Okan Burukdan soruşun”
“Qalatasaray”da birdən-birə əsas heyətdəki yerini itirən Viktor Nelsson Danimarka yığmasının düşərgəsində ölkəsinin jurnalistlərinə diqqətçəkən açıqlamalar verib.
"Football-plus.az" xəbər verir ki, əslində ötən mövsüm olduğu kimi bu mövsüm də İstanbul nəhəngində müdafiənin mərkəzində Nelsson ilə Əbdülkərim Bardakcının oynayacağı gözlənilirdi. Mövsümün ilk rəsmi oyunlarında məhz bu ikili şans qazanırdı. Amma “Kopenhagen”lə 2:2-lik bərabərlikdən sonra Nelsson bir dəfə də start heyətinə düşməyib! Halbuki o vaxtdan bəri “Cim-Bom” artıq 5 rəsmi oyun keçirib. Nelssonun yayda “Qalatasaray”ı tərk edəcəyi ilə bağlı çoxlu şayiə yayılsa da, o, komandada qalmışdı. Şənbə günü 25 yaşı tamam olacaq futbolçu gündəmə düşəcək ifadələr işlədib:
“Mançester Yunayted”lə görüşdə start heyətində olmamağım məni əsəbləşdirdi. Çox böyük üzüntü yaşadım. Son 3 (əsində 4 – Ə.R.) oyunda ehtiyatda qalmağım məni təəccübləndirdi. Siz hər şeyi kənardan görürsüz. Amma işin içində olan mənəm. Ən çox şok yaşayan, əsəbi və tükənmiş olan mənəm. Xüsusilə də “Yunayted”ə qarşı start heyətində olmağı çox istəyirdim. Ümumiyyətlə, ötən yığma fasiləsindən bu yana qəribə şeylər baş verir. Yeni bir kluba gedib “sizin üçün oynaya bilərəmmi” demək imkanım yoxdu. Artıq nəsə bir şey etməyin zamanıdı. Okan Buruk və Ərdən Timurla söhbət edəcəm. Tam səmimi şəkildə deyirəm ki, bu durum davam etsə, nəsə etməli olacam. İstanbulda futbol oynamaq üçün yaşayıram. Oynamasam, başqa bir yerə yollanmalı olacam. Ehtiyatda qalmağı sevmirəm! Yeni müqavilə ilə bağlı danışıqlar dayandırılıb. Ötən yığma fasiləsindən sonra müqaviləni yeniləməyəcəyimi birmənalı şəkildə bildirdim. Düzdü, danışıqlarımız davam edirdi və demək olar, anlaşmışdıq. Amma sonra bir qədər də düşündüm və vaz keçdim. Onsuz da hələ müqaviləmin bitməsinə 3 il var. 1 il də yeniləmək istəmədim. Nə üçün ehtiyatda qaldığımı bilmirəm. Bunu Okan Burukdan və klub rəsmilərindən soruşun. Heyəti Okan Buruk müəyyənləşdirir. Amma qalib gəlmək üçün ən yaxşı oyunçuları bəzən ehtiyatda da saxlayır. Açığı, yayda “Sevilya”ya keçməyə yaxın idim. Keçmək istədiyim bəzi klublardan təkliflər almışdım. Baş tutmadı. Transferin reallaşması üçün bəzi məsələlər həllini tapmalıdı. Bəlkə də təklif “Qalatasaray”ı qane etmədi. Daha yaxşı təklif gözlədiklərini iddia etmək olar. Bu durumla razılaşmaq da olar, razılaşmamaq da. Təyyarəyə minəcək qədər yaxın deyildim. Amma ən azı artıq təyyarəyə bilet sifariş vermək üzrəydim. Amma alınmadı. Hər şeyə rəğmən, hələ də “Qalatasaray”ın oyunçusuyam. Start heyətinə qayıtmağın yollarını tapmaq məcburiyyətindəyəm. Əsəbiyəm və bütün bunlar mənə təsir edib. Çünki dediyim kimi, ehtiyatda qalmağı sevmirəm və “Yunayted”ə qarşı oynamağı çox arzulayırdım. Yığmaya əsəbi və hirsli gəlməyim yaxşı haldı. Ümid edirəm ki, heç olmasa, burda oynaya biləcəm”.
Digər xəbərlər
