Mövsümə yaxşı başlamayan “Antalyaspor”da yeni prezidentin adına aydınlıq gəlib.

"Football-plus.az" xəbər verir ki, bilindiyi kimi, oktyabrın 9-da əvvəlki başqan Səbri Güləl təzyiqlərdən sonra istefa vermişdi. Srağagün formal xarakter daşıyan seçki keçirildi. Çünki yalnız bir namizəd var idi. 29 nəfərlik idarə heyəti ilə başqanlığa namizədliyini irəli sürən Semih Boztəpə 3 illik müddətə klubun yeni prezidenti seçilib. O, klubun əsl sahibinin azarkeşlər olduğunu bildirərək dəstəyə görə hər kəsə təşəkkür edib. 1982-ci il təvəllüdlü, əslən Sivasdan olan Boztəpə “Dekor Ayos” memarlıq şirkətinin sahibidi. Bu arada yeni prezidentin adı bəlli olandan sonra Nuri Şahinin baş məşqçi vəzifəsindən istefa verə biləcəyi ilə bağlı yenidən şayiələr yayılıb. Daha öncə Səbri Güləlin də istefasından sonra Şahinin yeni rəhbərliyin önünü açmaq üçün istefa verəcəyi iddia edilmişdi. Amma gənc məşqçi bu iddiaları yalanlamışdı. Bu dəfə isə problem ondan ibarətdi ki, Semih Boztəpə tərəfindən qurulan yeni idarə heyətində yer alan Ahmet Ağrı adlı şəxslə Şahinin münasibətləri qaydasında deyilmiş. Ağrı da Şahin kimi Almaniyada böyüyüb. Onlar bir-birini Almaniyadan tanıyırlar və aralarında ciddi problem var. Ağrı daha öncə “Antalyaspor”un digər prezidenti Əziz Çətinin dönəmində də klubda rəhbər kimi çalışıb. Nuri Şahin onun “Antalyaspor”da yönətici olmasını istəmir. Bu üzdən hər an istefa verə bilər. Klubun yeni rəhbərliyi isə qətiyyən 35 yaşlı mütəxəssislə yolları ayırmaq niyyətində deyil. Hazırda rəhbərlik Nuri Şahinlə dil tapmağa çalışır.

“Antalyaspor”la bağlı bir xəbəri də diqqətinizə çatdıraq. Xəbər verdiyimiz kimi, klubun braziliyalı üzvü Naldo Pereyranın 4 yaşlı oğlu Davi sentyabrın 7-də maşında olarkən qəzaya düşmüş və oktyabrın 16-da dünyasını dəyişmişdi. Yeni rəhbərlik Davinin adını yaşatmaq qərarına gəlib. Belə ki, məşq bazasındakı meydançalardan birinə onun adı verilib. Bundan başqa, Antalyada Davinin şərəfinə turnir keçiriləcək.