Misli premyer-liqasında 11-ci tura yekun vurulub.

"Football-plus.az" xəbər verir ki, "Araz-Naxçıvan" "Qarabağ"ı məğlub edib - 2:1. Matçdan sonra naxçıvanlıların çalışdırıcısı Azər Bağırovun mətbuat konfransı keçirilib. Sizi onun fikirləri ilə tanış edirik:

- Bu nəticələrdən sonra avrokuboklar haqda düşünmək olar?
- Komandanı oyundan oyuna kökləyirik. Heyətimiz o qədər də geniş deyil. Bu gün avrokuboklar çox çətindi. Çalışırıq hər oyunda nələrisə yaxşı edək. Cücəni payızda sayarlar. Biz işimizi görəcəyik. Bacardıqca yuxarı pillələrdə olmaq istəyirik.

- "Araz-Naxçıvan"da komanda və klub birdən formalaşdı. Bu, sizi qorxutmur?
- Oyundan sonra uşaqlara dedim ki, işimiz daha da çətinləşir. Bu gün böyük şeylər haqda danışmağa dəyməz. Gündəlik işimizi görməliyik. Düzgün iş gördükcə nəticə də gələcək.

- Bir neçə il əvvəl "Araz-Naxçıvan" bu stadionda"Qarabağ"a məğlub olandan sonra çempionatda iştirakını dayandırmışdı. Bu gün eyni məkanda onları məğlub etdiniz...
- Böyük bir şey etməmişik. Şans biz tərəfdə idi. Səbrli müdafiə olunduq. Rəqib qol vursaydı, tam fərqli şey ola bilərdi.

- Komanda bu mövsümdə Naxçıvanda oyun keçirə biləcək?
- Bu barədə məlumatım yoxdu. Rəhbərliyə aid olan məsələdi. Ümid edirəm tez bir zamanda məlumat olar.

- Müdafiəçiləri danlamadız?
- Uduzanda da futbolçulara danlamaq mənasında söz demirəm heç vaxt. Futbol səhvlərlə gözəldi.

- Orxan Əliyev Region Liqasından sizinlə birlikdə bura kimi gəldi. Bu, necə baş verdi?
- Hər insanın içində bir "mən" var. Ona motivasiya vermək lazımdı. Orxan bizi dinləyir, meydanda mübarizə aparır, səhvlərini boynuna alır. Vadim də həmçinin.

- Region Liqasından gəlib premyer-liqada uğurlu çıxış edirsiz. Bunu necə bacardınız?
- Bilmirəm bundan sonra necə olacaq. 2010-cu ildə "Neftçi"də seleksiyaçı məşqçi kimi çalışmışam. 2015-ci ildə PRO lisenziyası almışam. Qismətdən elə olub ki, premyer-liqaya dəvət almamışam. Bəlkə də çoxlarından çox çalışmışam. Komandalarım 1-ci liqada çempion olub. U-11 Liqasında belə işləmişəm. Qismət bu günə imiş. Öz bacarığımı göstərməyə bilməzdim.

- "Qarabağ" tərəfi ikinci qoldan öncə qayda pozuntusu olduğunu iddia edir. Siz necə düşünürsünüz?
- Heç vaxt hakimlərin işinə qarışmıram. Həmişə feyr-pleyi sevirəm.