"Hamı toplanışda olanda, biz hələ 12 nəfərlə Bakıda məşq edirdik"
Misli premyer-liqasında 8-ci tura yekun vurulub.
"Football-plus.az" xəbər verir ki, "Araz-Naxçıvan" "Zirə"ni məğlub edib - 1:0. Matçdan sonra qərblilərin çalışdırıcısı Azər Bağırovun mətbuat konfransı keçirilib. Sizi onun fikirləri ilə tanış edirik:
“Gərgin oyun oldu. Əbəs yerə deyil ki, "Zirə" bu mövsüm liderdi. Biz bu görüşdə uduza da bilərdik. Amma şükürlər olsun ki, sona qədər mübarizə apardıq, səbirlə müdafiə olunduq və istədiyimiz qolu vurub üç xalı qazana bildik”.
- Yeni yaranmış komandasız, ancaq uğurlu çıxış edirsiz. Rahatçılığın qarşısını necə alırsız?
- Bəlkə də, hər gün futbolçularla fərdi və kollektiv şəkildə danışırıq. Geridə qalan 8 tur ərzində yalnız “Sumqayıt”la ilk 45 dəqiqədə bir az zəif oynadıq. Demək olar ki, ilk yarını rəqibə uduzmuşduq. Qalan matçlarda yaxşı idik. "Qarabağ"a qarşı çox yaxşı oynadıq, "Neftçi" ilə matçda qalib gəldik. Şükürlər olsun ki, futbolçularımız eyforiyaya qapılmayıb.
- “Araz-Naxçıvan” mövsümöncəsi hazırlıq dövrünü ölkə xaricində keçmədi. Üstəlik, ən gec yığılan komanda olduz....
- Bunlar artıq geridə qalıb. Biz bəhanə gətirməyi heç vaxt sevməmişik. Hamı toplanışda olanda, biz hələ 12 nəfərlə Bakıda məşq edirdik. Bunların hamısı geridə qalıb, bəhanələri atmaq lazımdı. Günlərimiz olub ki, 2-3 saat yatmışıq. Yəni, əvvəl itirdiyimiz vaxtı kompensasiya etmişik. Bu gün qalib gəlsək də, yenə işimiz çoxdu.
Digər xəbərlər
