Misli premyer-liqasının 6-cı turunda "Araz-Naxçıvan" öz meydanında "Neftçi"yə qalib gəldi - 1:0.

Oyundan sonra naxçıvanlıların baş məşqçisi Azər Bağırov media nümayəndələrinin önünə çıxdı. Sizi əvvəlcə mütəxəssisin fikirləri ilə tanış edirik:

- Adrian Mutu dedi ki, 10 nəfərlə müdafiə olunan rəqibə qarşı oynamaq çətin idi. Bu fikirlə razısınız?
- Adrian Mutunun fikirlərinə hörmətlə yanaşıram. Amma biz epizodik olanda arxada otururduq. Mən açıq futbol oynamağı xoşlayıram. Hətta 10 nəfərlə qalandan sonra da rəqibi qabaqda sıxıb, pressinq edirdik. Həmişə çalışmışam ki, rəqib tərəfdə oynayaq və üstünlük bizdə olsun.

- Qələbəyə görə xüsusi oyunçulara xüsusi mükafat olacaq?
- Rəhbərliyin qərarından sonra bunu görəcəyik. Amma bu gün "Neftçi" ilə oynayırdıq deyə, xüsusi hazırlığımız da yox idi . Meydana hər oyuna oyunu kimi çıxdıq, qalib gəldik. Rəhbərlik hansı mükafatı verərsə, onunla da kifayətlənəcəyik.

- “Araz-Naxçıvan” hansı pillədə qərarlaşsa, sizi qane edəcək?
- Hansısa pillə barədə düşünmürük. Bu günlə yaşayıram və sabaha baxıram. Komandama ən yaxşısını etməyə çalışıram. Hansı pillədə olacağımızı sonda biləcəyik. Amma maksimumu etməyə çalışırıq.

- PRO kateqoriyalı məşqçi bu gün "Neftçi" kimi tarixi, tanınmış baş məşqçisi olan rəqibi məğlub etdi. Hisləriniz necədi?
- Normal. Qolu vurduğumuz zamanda da çox sevinmədim. Mənim üçün önəmli olan qol yox, komandanın nəticəsidi. Komandam nəticə qazanırsa, içimdə sevinirəm. Arada düşünürəm ki, nəyisə daha yaxşı etmək olar. Dünənlə yaşamırıq, bu gün maksimumu edib, sabahı düşünürük. Nəticə gələcək. “Neftçi”ni udduq və ya “Qarabağ”a uduzduq, fərq etməz. Hər oyunda komanda üçün nə vacibdirsə, onu edirik. Hansısa komandanı udmaq mənə şöhrət gətirmir. Əsas olan üç xal və komandamızın qələbəsidi.

CAVİD ƏLİYEV