“İrəvan”ın rəhbərindən şok açıqlama: “O, yalan danışır”
“İrəvan”ın futbolçuları tibbi baxışdan keçirmədən PFL-ə arayış təqdim etdiyini diqqətinizə çatdırmışdıq. Komandanın kapitanı Vüqar Bəybalayevin açıqlamasından belə anlaşılır ki, Qərbi Azərbaycan təmsilçisi qurumu aldadıb.
Məsələ ilə bağlı PFL-in texniki-idman direktoru Elgiz Abbasova müraciət etdik. Qurum rəsmisi “Football-plus.az”a açıqlamasında bunları söylədi:
“Peşəkar Futbol Liqasında futbolçuların qeydiyyatdan sonra sifarişi mərhələsi var. Sifariş üçün göndərilən bütün futbolçuların tibbi arayışları təqdim olunmalıdı. Bu gün PFL bayrağı altında keçirilən istənilən yarışda çıxış edən istənilən oyunçunun tibbi arayışı təqdim olunub".
Məsələ ilə bağlı dəqiq informasiya əldə etmək üçün klubun prezidenti Zahid Niyazəliyevlə əlaqə saxladıq. “İrəvan”ın rəhbəri bunları söylədi:
“Bütün məsələlərlə bağlı mətbuat konfransı keçirəcəyik. Hər şey orda ictimaiyyətə açıqlanacaq. Tibbi arayışla bağlı məsələ yalandı. Vüqar Bəybalayev yalan deyir. Elə şey yoxdu. Yenə deyirəm, bu məsələlərlə bağlı yaxın günlərdə mətbuat konfransı keçirəcəyik. Orda hər şey bəlli olacaq”.
Maraq üçün qeyd edək ki, futbolçuların tibbi baxışdan keçmədiyini təkcə Vüqar Bəybalayev yox, Asim Əlizadə də “CBC Sport”da yayınlanan “90 dəqiqə” verilişində ictimaiyyətə açıqlamışdı.
İLKİN SULTANLI
Digər xəbərlər
