“İrəvan” rəhbərliyinin daha bir saxtakarlığı üzə çıxdı
“İrəvan”ın günlərdi davam edən problemi hələ də həllini tapmayıb.
Klub rəhbərliyi futbolçuların maaşını vermir, onlar da məşqə çıxmır. Belə görünür ki, oktyabrın 26-na nəzərdə tutulan “Şamaxı” ilə oyun da olmayacaq. Bu proses davam etdiyi müddətdə klubun saxtakarlıqları da üzə çıxır. Sən demə, “İrəvan” mövsümün əvvəlində futbolçuları tibbi baxışdan keçirməyib. Bu iddianı “CBC Sport”un “90 dəqiqə” verilişində komandanın üzvü Asim Əlizadə səsləndirib. Əslində tibbi arayışlar PFL-ə təqdim olunmalıymış. Əks təqdirdə komanda çempionata buraxılmayacaqmış. “İrəvan” isə saxta sənəd hazırlayaraq PFL-ə təqdim edib.
Bu iddianın kapitanı Vüqar Bəybalayev də "Football-plus.az"a açıqlamasında təsdiqlədi:
“Doğrudu ki, futbolçular tibbi baxışdan keçməsə, klub həmin sənədləri PFL-ə təqdim etməsə, çempionata buraxılmır. Biz 1-ci liqanın ilk turuna – “Zaqatala” ilə oyuna hazırlaşırdıq. Oyuna üç gün qalmışdı. Klub rəhbərliyi həmin vaxt tibbi baxışdan keçmək söhbətindən xəbərdar oldu. Bizə dedilər ki, hazırlaşın. Sonra tibbi baxışdan keçməyərək Zaqatalaya yollandıq. Hansısa yolla saxta sənədlər hazırladaraq PFL-ə təqdim etdilər. Necə etdiklərini bilmədim. Amma əminliklə deyə bilərəm ki, heç birimiz tibbi baxışdan keçməmişik. Futbolçuların sağlamlığını təsdiq edən sənədlər doğru deyildi. Ola bilər ki, hansısa futbolçunu səhhətində problem var. Lakin ona saxta arayış verilib və həmin oyunçu 1-ci liqada oynayır”.
Yarımmüdafiəçi komandanın üzvlərinin hansı şərtlərlə məşqə çıxacağını da açıqladı:
“Bizə sual verirlər ki, bəzilərinizin pulu ödənsə, məşqə çıxarsız? Təbii ki, yox! Biz komanda olaraq, başverənlərə etiraz etdik. Nazim Süleymanov iclasda dedi ki, kim istəmirsə, çıxıb gedə bilər. Hamı da bir nəfər kimi məşqə çıxmadı. Bəli, hər kəs öz haqqını tələb edir. Pullarımızı almaq istəyirik. Amma bu yola komanda kimi çıxmışıq. Tutaq ki, mənim bütün pulumu ödədilər, başqaları qaldı. Deməyəcəm ki, vəssalam. Bunu özümə yaraşdırmaram. Hamımızın problemi həll olunmalıdı. Tutaq ki, pullarımızı verdilər, amma Asimin əməliyyatına boyun olmasalar, yenə də etirazımız davam edəcək. Bu, bizə yaraşar? Asim dəfələrlə bazaya axsayaraq gəlib. O uşağın əməliyyatı vacibdi. Onsuz da 6 ay futbolsuz qalacaq. 2 ay da burdan itirib. Edir 8 ay. Asim əməliyyat olunmasa, meydana çıxıb məşq edərəm? Təbii ki, yox! Vicdanım buna imkan verməz. Onlardan aldığım pulu ailəmə yedirə bilmərəm. Normal, kişi kimi fikirləşən azərbaycanlı bunu etməz. Mən belə fikirləşirəm. Kimsə başqa cür hərəkət etsə, ona qiyməti oxucular, futbol ictimaiyyəti, Azərbaycan xalqı versə, daha yaxşı olar. Mən şəxsən ən az maaş alandan heç oynamayana kimi hamının pulunun verilməsini tələb edirəm. Eyni zamanda bonuslarımızı versinlər və Asimin yaxşı şəraitdə əməliyyat olunmasına şərait yaratsınlar. Bütün Azərbaycanda futbolla maraqlanan insanların diqqəti bizdədi. Bu gün təkcə özünün maaşı veriləcəyi təqdirdə məşqə çıxmağı düşünən şəxs sabah bu qədər insanın üzünə necə baxacağını da fikirləşməlidi. Təbii ki, kimsə problemi olduğunu əsas gətirə bilər. Amma hamının evində nəsə çatışmır, hər kəsin pula ehtiyacı var. Bu səbəbdən də biz bir yola baş qoyduq. Kimsə öz pulunu alsa və başqalarını fikirləşməsə, normal hərəkət etmiş olmaz”.
İLKİN SULTANLI
Digər xəbərlər
