Misli Premyer-liqasının 2-ci turunda "Qəbələ" səfərdə "Araz-Naxçıvan"a (0:2) hesabı ilə məğlub olub.

"Football-plus.az" xəbər verir ki, matçdan sonra "qırmızı-qaralar"ın çalışdırıcısı Elmar Baxşıyev media nümayəndələrin suallarını cavablandırıb. Sizi mütəxəssisin fikirləri ilə tanış edirik:

- "Omoniya" ilə ilk matçda tam fərqli "Qəbələ" görmüşdük. Bundan sonra kollektivdə nə baş verdi?
- "Sabah"a məğlubiyyəti yorğunluqla əlaqələndirirəm. Amma bu gün heç bir yorğunluq olmamalıdı. Psixoloji vəziyyət pisə gedirsə, futbolçularıma siqnal vermək istəyirəm ki, daha da möhkəm olsunlar. İdmançı oyundan-oyuna artırmalıdı. Bəli, Konfrans Liqasında bir hissədə 5-6 epizoda girirdik. Son iki oyunda komanda sıfır epizoda girib. Nəinki bu son iki matç, mən burda olandan "Qəbələ" belə zəif olmayıb. Xarakter göstərmək önəmlidi.

- Sanki komandada lider oyunçular yoxdu?
- Hər bir komandanın lideri olmalıdı. İstəməzdik ki, yayda 10 nəfər bizdən ayrılsın. Amma futbolun da öz gerçəkləri var. Lideri komanda özü seçməlidi. İnanıram ki, gələcək zamanlarda lider özünü göstərəcək. Potensialı olan futbolçularımız var. Dəyişiləcək çox şeylər var.

- Ülvi İsgəndərovun qırmızı vərəqə epizodu haqda danışardınız...
- Heç bir futbolçu elə hərəkət eləməməlidi. Klubumuzun intizam kodeksi var. Ülvi də cəzalanacaq. O, anlamalıdı ki, komanda məğlub olduğu vəziyyətdə belə davranış göstərməməlidi.