10 ballıq sistemlə

Şahruddin Məhəmmədəliyev – 7,0
Komandamızın heyətində ən yaxşılardan idi. Türkiyədə çox forma şansı qazanmasa da, dünən, demək olar ki, səhvsiz oynadı. 5 kritik seyvlə yadda qalan qapıçının yeganə problemi irəli göndərdiyi bəzi ötürmələrin qeyri-dəqiq alınması idi. Amma bu çatışmazlıq da uğurlu oyunun kölgəsində qaldı.

Elvin Cəfərquliyev – 6,5
Oyunun əvvəlində bəzi səhvlərə yol versə də, ümumi performansı hər kəsi qane etdi. 90 dəqiqə meydanda olan cinah oyunçusu həm müdafiəyə, həm də hücuma davamlı dəstək verməklə yadda qaldı. Bu cəhətdən bəzi xırda səhvləri görməzdən gəlmək olar. Elvin həm də 9-cu dəqiqədə “Qarabağ”da da komanda yoldaşı olan Torala qol ötürməsi verdi.

Anton Krivotsyuk – 7,0
Müdafiəçinin oyuna hazırlıq səviyyəsini hələ 17-ci dəqiqədə Cəfərquliyevin səhvini “sığortalayarkən” gördük. Yarım saatın tamamında Anton daha bir epizodda xüsusi fərqlənməklə müdafiəmizin estonlara qarşı keçilməz olduğunu göstərdi. Ümumiyyətlə, dünən müdafiənin mərkəzini qoruyan iki futbolçu tam təmkinli və risksiz oynadı. Estoniya kimi rəqiblərə qarşı maksimal nəticə əldə etmək üçün tələb olunan da məhz belə sadə və səhvsiz oyundu.

Höccət Haqverdi – 6,5
Estonların qapımıza yol tapa bilməməsində xüsusi əməyi olanlarda biri də Höccətdi. Hiss olunurdu ki, müdafiəçi səhv etməkdən çox çəkinir. Elə bu məqsədlə də top onda olarkən təmkinli və risksiz oyun müşahidə edirdik. Höccətin tez-tez geriyə, Şahruddinə doğru oynaması təəccüblü deyil. De Byazini onu yığmaya çağırdığı üçün daim tənqid edirlər. Höccət dünən özünü sübut etməyə çalışdı və bunu müəyyən mənada bacardı.

Rahil Məmmədov – 6,0
Digər müdafiəçilərlə müqayisədə ən çox səhvə yol verən futbolçularımızdan biri oldu. Rahilin irəli göndərdiyi topların çox az qismi ünvanına çatırdı. Adi mübarizə epizodunda qaydanı pozaraq sarı vərəqə ilə cəzalandırılmasını da vurğulamaq lazımdı. Bu görüşdə qiymətini yüksəldən əsas amil yığmaya penalti qazandırması oldu. “Qarabağ”ın müdafiəçisinin müsbət mənada yadda qaldığı əsas epizod məhz bu idi.

Bəxtiyar Həsənalızadə - 5,0
Passivinə sarı vərəqə yazdırmış və elə də parlaq oyun nümayiş etdirməyən Rahili əvəz edən Bəxtiyar qısa vaxt ərzində müdafiəmizin keçilməz qalması üçün əlindən gələni etdi. Rəqibin məhz onun cinahından yaranan bəzi təhlükəli hücumları olsa da, ümumilikdə oyuna o qədər də pis qoşulmadı.

Toral Bayramov – 7,0
Erkən qolla meydan sahiblərini məyus etməyi bacardı. 9-cu dəqiqədə Elvinin qapı qarşısına əla ötürməsini baş zərbəsi ilə qapının yaxın küncünə göndərdi. Estonlar hücumlarını daha çox mərkəzdən və digər cinahdan inkişaf etdirdikləri üçün Toral özünü Elvin qədər yormadı. Təəssüf ki, “Qarabağ”ın şərəfini qoruyan cinah müdafiəçisi 2-ci hissədə görünmürdü. Elə bu səbəbdən De Byazi onu sona 15 dəqiqə qalmış Qismət Alıyevlə əvəzlədi.

Aleksey İsayev – 5,0
Millinin heyətində ən zəif performans göstərən futbolçulardan biri idi. Oyunun əvvəllərində onun əvvəllər Qara Qarayevin daşıdığı dağıdıcı oyunçu funksiyasını üzərinə götürdüyünü görsək də, sonradan komandanın oyununa heç bir əlavə töhfə verə bilmədiyi aşkar göründü. Bəzi kombinasiyalarda fəal iştirak etsə də, başqa heç nə ilə yadda qala bilmədi və 69-cu dəqiqədə Elvin Camalovla əvəzləndi.

Elvin Camalov – 4,5
Son 21 dəqiqədə meydanda olan Elvin haqda deyiləsi çox söz yoxdu. Oyuna çox passiv qoşulan yarımmüdafiəçi bir o qədər də səliqəsiz oynadıb, orta xətdə müəyyən boşluqlara yol açdı. Yaxşı ki, De Byazi onu start heyətinə salmamışdı.

Coşqun Diniyev – 6,0
Əksər epizodlardan qalib ayrılmağı bacardı. Oyunun əvvəlində Coşqunla Alekseyin eyni dərəcədə passiv olduğunu görürdük. Lakin sonradan “Umraniyəspor”un üzvü daha istəkli oynadı. Doğrudu, bəzi epizodlarda ötürmələrin dəqiqliyinə fikir vermir, topu kor-koranə uzaqlaşdırmağa çalışırdı. Amma ümumilikdə sona qədər inamlı təsir bağışladı.

Emin Mahmudov – 6,5
Komandamızın ilk qol hücumunun fəal iştirakçısı olan kapitanın performansı dünən gözləntilərin çox altında idi. İstənilən halda, bir çox təhlükəli hücumun qurulmasında iştirak etdi, uğurlu ötürmələrlə yadda qaldı. Penalti şansını Ramil Şeydayevə ötürməsi də, təbii ki, yaddan çıxmayıb.

Ramil Şeydayev – 7,0
Ən çox tər tökən futbolçulardan biri idi. Öndə uğurlu driblinqlər, davamlı pressinq tətbiq edərək oynamaq asan iş deyil. Ramil 90 dəqiqədən artıq vaxt ərzində vəzifəsinin öhdəsindən layiqincə gəldi. Penaltini də ustalıqla yerinə yetirərək yığmaya ikinci qolun sevincini yaşatdı.

Mahir Emreli – 6,5
İlk dəqiqələrdə passiv görünsə də, sonradan nə qədər istəkli olduğu ortaya çıxdı. Bir neçə dəfə rəqiblərini uğurla keçərək “çərçivə”ni uzaqdan nişan alsa da, heyif ki, baxımlı qol vurmaq istəyinə çata bilmədi. Bəlkə də sona qədər meydanda qalsaydı, rəqib qapıçını üçüncü dəfə məyus edə bilərdi. Özü də bunun fərqində olduğu üçün De Byazi onu əvəzləyərkən narazılığını gizlətmədi. Dünən passivinə lazımsız sarı vərəqə yazdıranlardan biri də Mahir oldu.

Renat Dadaşov – 5,0
70 dəqiqə meydanda davamlı pressinq edən, rəqibin müdafiə xəttini təzyiq altında saxlayan Mahiri əvəzləyən Renat da eyni üslubda mübarizə aparmağı seçdi. Hətta sonda çox yaxşı şanslar da əldə etdi, lakin bunları dəyərləndirməyi bacarmadı. Bunlardan biri qapıçı ilə üzbəüz qaldığı və topu onun üzərinə vurduğu epizod idi. İkincisi isə final fitindən saniyələr öncə yaşandı. Renatın Şeydayev istiqamətinə verdiyi ara ötürməsi o qədər pis alındı ki, yığmamız bəlkə də üçüncü qoldan oldu. Yenə də 20 dəqiqə meydanda olan “Hatayspor”lu forvard komandanın uğuru üçün xeyli tər tökdü.

Filip Ozobiç – qiymətsiz
Qismət Alıyev – qiymətsiz

ADİL NƏHMƏTLİ