Millimiz AÇ-2024-ün seçmə mərhələsində növbəti oyununa çıxıb. Yığmamız F qrupunun 3-cü turunda Estoniyanı qəbul edib. "Dalğa Arena"da keçirilən görüş 1:1 hesabı ilə başa çatıb.

"Football-plus.az" yığma üzvlərinin qiymətləndirməsini təqdim edir:

(10 ballıq şkala üzrə)

Şahruddin Məhəmmədəliyev – 6,0
Şahruddin olmasaydı, bəlkə də estonlar matçın taleyini ilk hissədə həll edəcəkdi. İlk 45 dəqiqədə qolkiper ən azı iki dəfə komandasını real qoldan xilas etdi. Qonaqlar fərqlənərkən onun səhvinin olmadığını da qeyd etmək lazımdı.

Bəhlul Mustafazadə - 5,5
Mərkəz müdafiəçisi 90 dəqiqəni heç də eyni tempdə keçirə bilmədi. Xüsusilə ilk yarıda o qədər də xoş təsir bağışlamadı. Bəzən inamlı oynayıb rəqibin futbolçuları bağlaya bilirdisə, bəzən də qarşısındakı oyunçunun onu çox asanlıqla keçməsinə imkan verirdi.

Bədavi Hüseynov – 5,5
Bədavi barədə də birmənalı fikir səsləndirmək çətindi. Birinci hissədə komandanın bərbad oyunu fonunda mərkəz müdafiəçisi seçilirdi. Ancaq parlaq çıxış etdiyini də demək olmaz. Xüsusilə birinci ötürmələri çox vaxt ünvana çatmırdı ki, bu da top itkisinə, rəqibin yenidən hücuma keçməsinə şərait yaradırdı. Rəqibin qapısı istiqamətində yaddaqalan bir zərbəsi isə “çərçivə”dən cüzi fərqlə aralı keçdi.

Höccət Haqverdi – 3,0
Yığmadakı ilk oyunlarına stopper kimi çıxan müdafiəçi sağ cinaha çəkiləndən sonra heç də özünə bənzəmir. Ancaq nədənsə istər klubunda, istərsə də millidə baş məşqçilər onu məhz müdafiənin sağında oynadır. “Milliləşdirilən” futbolçu ötən şənbə bəlkə də ən zəif oyunlarından birini keçirdi. Formada olmadığı xüsusilə 21-ci dəqiqədə özünü büruzə verdi. Höccət topun meydanı tərk edəcəyini düşündüyündən sona qədər qaçmadı. Bundan istifadə edən rəqib futbolçu topun çıxmasına imkan vermədi. Haqverdi həmin an belə özünə əziyyət verib 38 yaşlı Konstantin Vasilyevin üstünə getmədi. Yaxşı ki, Bəhlul vaxtında komanda yoldaşının səhvini “sığortaladı”. Əks halda, kim bilir hücum necə yekunlaşacaqdı. De Byazi Höccətin formada olmadığını oyunun gedişində hiss etdi və bu səbəbdən fasilədə əvəzlədi.

Elvin Cəfərquliyev – 3,0
Növbəti dəfə “Qarabağ”la müqayisədə millidə fərqli Elvin gördük. Klubunda daim hücumlara dəstək verən, sürəti ilə rəqiblərə başağrı olan Cəfərquliyev şənbə günü “Dalğa Arena”da itib-batmışdı. Müdafiənin solunda çıxış edən futbolçu nə hücuma istənilən səviyyədə qoşulur, nə də müdafiədə xoş təsir bağışlayırdı. Bu üzdən fasilədə əvəzlənənlər arasında o da var idi.

Elvin Camalov – 4,0
Fərdi planda heç də pis görünmürdü. Meydanın mərkəzində, dayaq yarımmüdafiəçisi mövqeyində çıxış edən “Sabah”ın kapitanı ikili mübarizələrdə inamlı idi, dağıdıcı kimi işinin öhdəsindən gəlirdi. Çatışmayan cəhəti “ikinci mərtəbə”də zəif olması idi ki, bu da fiziki göstəricilərindən irəli gəlirdi. Fasilədə əvəzlənməsinə gəlincə, böyük ehtimalla baş məşqçinin taktiki gedişinə görə oldu.

Emin Mahmudov – 5,5
Məhz kapitanın kornerdən asmasından sonra Anton hesabı bərabərləşdirməyi bacardı. İlk hissədən fərqli ikinci yarıda daha xoş təsir bağışladı. Birinci 45 dəqiqənin sonlarına yaxın “çərçivə”yə gedən zərbəsi də yaddaqalan oldu. Ümumilikdə isə millinin lideri kimi ümidləri doğrultmadı.

Aleksey İsayev – 3,5
“Milliləşdirilən” yarımmüdafiəçi hələ də klubundakı oyunu yığmada nümayiş etdirə bilmir. İsayev “Sabah”ın “düşünən beynidi”, amma ölkənin əsas komandasında sanki hələ də ansambla uyğunlaşa bilmir. İkinci hissədə - yığma daha xoş təsir bağışladığı dəqiqələrdə də ümidləri doğrultmadı.

Mahir Emreli – 4,0
İlk dəqiqələrdən fəal olmağa, kreativ oynamağa çalışsa da, komandanın bərbad çıxışı ona da təsir etmişdi. Yalnız hissənin sonlarına yaxın oyunu alınmağa başladı. İkinci yarıda da nəsə etməyə çalışırdı. Ancaq təəssüf ki, Mahir hələ də yığmada kəmiyyəti keyfiyyətə çevirə bilmir.

Ramil Şeydayev – 4,0
Yığmada çıxış etməyə başlayandan estonlarla oyunun birinci hissəsi Ramil üçün ən uğursuz 45 dəqiqə kimi yadda qalacaq. İlk yarıda, demək olar, heç nə alınmadı. Nə ayağında top saxlaya bildi, nə ikili mübarizə uddu, nə də hücumları kəskinləşdirdi. Fasilədən sonra isə oyununda dönüş yaratdı ki, bu da hesabda əksini tapdı. Məhz Şeydayevin həmləsindən sonra yığma künc zərbəsi vurmaq hüququ qazandı ki, o da qolla nəticələndi.

Renat Dadaşov – 3,0
Şənbə günü meydanda ən “zəif bənd”lərdən biri də qürbətçi-futbolçu idi. Renat da hələ ki yığmada ən yüksək keyfiyyətlərini ortaya qoya bilmir. Əslində meydanda olduğu 80 dəqiqədə topla təchiz olunmayan forvarddan qeyri-adi nəsə gözləmək də absurddu.

Qismət Alıyev – 4,0
Fasilədə Höccəti əvəzləyən müdafiəçi fəal təsir bağışladı, öz cinahında inamlı göründü. Ən azı səhvsiz oynamaqla heç-heçədə pay sahibi oldu.

Toral Bayramov – 4,5
Fasilədən sonra meydana çıxan “Qarabağ”ın futbolçusu cinah müdafiəçisi kimi oynamalı olsa da, daha çox hücumlara dəstək verməklə yadda qaldı. Bu da komandanın ikinci hissədə beşli müdafiəyə keçməsindən qaynaqlanırdı. Topla daha çox təmasda olan Bayramov əvəzlədiyi Elvindən faydalı oldu. Onun son saniyələrdəki keçidindən sonra Ozobiç əlverişli zərbə mövqeyinə çıxdı və dirəyi nişan almaqla yadda qaldı.

Anton Krivotsyuk – 6,0
İkinci yarıda meydana çıxmasına baxmayaraq, oyuna çox uğurlu qoşuldu. Müdafiədə işi çox olmasa da, rəqibin nadir hücumları vaxtı inamlı təsir bağışlayırdı, xüsusilə də “ikinci mərtəbə”də. Fərqləndiyi epizodda isə rəqib müdafiəçilərdən məharətlə sıyrılıb başla dəqiq oynadı.

Filip Ozobiç – qiymətsiz
Musa Qurbanlı – qiymətsiz

RƏŞAD