(10 ballıq sistemlə)

Şahruddin Məhəmmədəliyev - 5,0
Qapıçı özünü yaxşı tərəfdən göstərdi. 4-cü dəqiqədə dirəkdən qayıdan top daha dəqiq nişan alınsa, qol olacaqdı. Çünki Şahruddin yetərincə irəli atılmamışdı. Bundan sonra qapıçı 6 qurtarışla yadda qaldısa, buraxdığı 1 qolla rəqibi sevindirdi. Karraskonun zərbəsiylə tora qovuşan top yönünü dəyişdiyindən qapıçıda çaşqınlıq yaratdı. Düzdü, Şahruddin əvvəlki yerində qalsaydı, topu qaytaracaqdı. Bununla belə, onu qınamaq olmur.

Bəhlul Mustafazadə - 5,5
Müdafiəçi Belçika sınağında özünü sübut etdi. Bəhlul hər kəsin ulduz saydığı Lukakuya qarşı inamlı mübarizə apardı. Dəfələrlə rəqibin təhlükəli hücumlarına sədd çəkdi. Hətta müdafiəçinin keçilməzliyi qarşı tərəfdə onu zədələmək istəyi yaratmışdı. Matçdan sonra jurnalistlərə açıqlamasında mübarizədən zövq aldığını deyən futbolçu eyni hissləri azarkeşlərə də aşıladı.

Rahil Məmmədov - 5,0
Mərkəz müdafiəçisi məsuliyyətli çıxış etdi. İşini qüsursuz gördüyünü demirik, lakin ciddi səhvdən də söhbət getmir. Rahil Lukaku, Bakayoko və Karrasko kimi təcrübəli hücumçulara qarşı inamlı oynadı. Təbii ki, burda beşli müdafiə xəttinin rolunu qeyd etmək lazımdı.

Anton Krivotsyuk - 4,5
Son cinah Ukrayna əsilli müdafiəçiyə tapşırılmışdı. O, rəqibin sürətli hücumları zamanı əziyyət çəkirdi. Həyəcanlı və tələsik oyun sərgilədiyindən yalnış ötürmələrlə yadda qaldı. Təzyiq lazımi epizodlarda zonasını qapatmağa mane olurdu. Yaxşı ki, komanda yoldaşlarının dəstəyi ilə toparlanıb faydalı iş əmsalını artırdı. Bundan sonra belçikalıların cərimə meydançasında asma və ötürmələr etməsi çətinləşdi.

Elvin Cəfərquliyev - 5,0
Elvin müdafiə xəttinin əsas dirəklərindən oldu. Bəhluldan sonra onu tərifləməyə haqqımız var. Çünki rəqib hücumçulara yaratdığı çətinliklə ön planda idi. Sol cinahı qorusa da, digər mövqelərə də müdaxilə edirdi. O, 74-cü dəqiqədə topu rəqibdən alaraq qapıya çatdı və həlledici zərbəni özü vurdu. Lakin həm xəsisliyi, həm də qapını qeyri-dəqiq nişan alması üzündən əziyyəti puç oldu.

Coşqun Diniyev - 4,5
"Ümraniyəspor"un oyunçusu ümumilikdə qənaətbəxş çıxış etdi. Dəqiq desək, az qala kobud səhvi üzündən qonaqlar fərqi artıracaqdı. Şahruddinin uğurlu seyvi Diniyevin üzündən yaranan təhlükəni aradan qaldırdı. Futbolçu növbəti dəqiqələrdə “günahını yudu". O, hücum cəhdlərində rəqibə çətin anlar yaşatdı. Bəzi hallarda isə məsuliyyəti üzərinə götürüb risk etdi. Kastels 65-ci dəqiqədə onun uzaqdan zərbəsini zərərsizləşdirdi. Qoldakı kobud səhvinə görə qiymətini azaltmağa məcburuq.

Emin Mahmudov - 4,5
Kapitan öhdəliklərini layiqincə yerinə yetirə bilmir. Oyunun əvvəlində real qol şansından yararlansaydı, hər şey fərqli ola bilərdi. Önünə düşən topu müdafiəçiyə vurdu. Burda qapıçının yerdə qaldığını və hadisələrə müdaxilə şansının minimum olduğunu qeyd etməliyik. Hər halda, kapitan sarğısıyla yüzfaizlik qol imkanını qaçırmaq uzlaşmır. Künc zərbəsindən birbaşa qol vurmaq istəyi də reallaşmadı. Bundan sonra Eminin "dişə vurulası" epizodunu görmədik.

Toral Bayramov - 4,5
22 yaşlı cinah müdafiəçisini ilk yarıda hiss etmədik. Komandaya faydalı olmaq istəsə də, ortaya iş qoymadı. Eminin yerinə yetirdiyi künc zərbəsində topu ələ keçirən oyunçunun qol vurmaq cəhdi boşa çıxdı. Görünür, Toral buna qətiyyən hazır deyildi. Yəqin ki, topun ona çatacağına inanmamışdı.

Mahir Emreli - 4,5
De Byazi 62-ci dəqiqədə Toralı Mahirlə əvəzlədi. Müdafiəçinin əvəzinə meydana çıxan hücumçudan gözləntilər haqlı olaraq böyük idi. Lakin 1 ay əvvəl Çempionlar Liqasında Qazaxıstan "Astana"sına qol vuran, Xorvatiya çempionatında çıxdığı 4 matçda 2 qol, 1 məhsuldar ötürmə ilə yadda qalan futbolçu bu dəfə özünü yaxşı tərəfdən göstərə bilmədi.

Aleksey İsayev - 4,5
Yarımmüdafiəçi komanda yoldaşlarından aşkar geri qalırdı. Elvin və Anton "Sabah"ın futbolçusunu "sığortalamasaydı”, indi daha ciddi səhvləri qeyd edəcəkdik. Yaxşı ki, müdafiə xəttimiz çoxbilmiş belçikalıların məhz onun buraxdığı boşluqlardan yararlanmasına mane olurdu. Nəhayət, bunu müşahidə edən De Byazi 62-ci dəqiqədə onu əvəzlədi.

Emil Səfərov - 5,0
“Qəbələ”nin hücumameyilli yarımmüdafiəçisi yığmada debüt etdi. Onda ciddi çatışmazlıq hiss olunmadı. Həyəcanlı da deyildi. Əskinə, bir neçə oyunluq təcrübəsi varmış kimi Alekseyin əvəzinə meydana atıldı. Bir neçə dəfə müdafiədə rəqibi zərərsizləşdirdi, əks-hücumların qarşısını aldı. Debütü məğlubiyyətlə əlamətdar olsa da, fərdi keyfiyyətlərini göstərə bildi.

Renat Dadaşov - 5,0
Hücumçu gözləri yolda qoydu. Amma Ramilin 31-ci dəqiqə qapı önünə göndərdiyi topu başla "çərçivə"yə salmaq cəhdi pis deyildi. Belçikalı qapıçı qolun qarşısını əla seyvlə almasaydı, bəlkə başqa Renat izləyəcəkdik.

Musa Qurbanlı - 5,0
Baş məşqçi hesabı bərabərləşdirmək üçün yorğun Renatı Musayla əvəzlədi. Bu, yanlış qərar deyildi. Çünki hücumçunun İsveç çempionatına uyğunlaşması və qollar vurması ümidlənməyə imkan verirdi. Ya baş məşqçi Musanı meydana gec buraxmışdı, ya da futbolçu oyunun axarına uyğunlaşa bilmədi. Hücumçu bir dəfə toru yandan sirkələdi. Növbəti dəqiqələrdə rəqibə ciddi təzyiq göstərməyi bacarsa da, qol vura bilmədi.

Ramil Şeydayev - 6,0
Bəhlul müdafiənin dirəyiydisə, Ramil də hücumun ulduzu oldu. 31-ci dəqiqədə Renata yaxşı cinah asması verdi. 33-cü dəqiqədə isə özü qapıçını “yoxladı”. Ramilin effektli zərbələrini Kastels qarşılayırdı. Buna baxmayaraq, futbolçu ruhdan düşmür, bəzən müdafiəçilərə kömək edir, bəzən də hücum cəhdlərində pay sahibi olurdu.

Yusif Nəbiyev - qiymətsiz

Filip Ozobiç - qiymətsiz

KƏNAN BAHADIR