“Qalatasaray” bir tərəfdən heyəti gücləndirmək barədə düşünsə də, digər tərəfdən hər an əsas oyunçulardan birini və ya bir neçəsini əlindən buraxa bilər.

Football-plus.az xəbər verir ki, birdən-birə 5 futbolçu Avropa klublarının maraq dairəsindədi. Söhbət Viktor Nelsson, Saşa Boe, Lukas Torreyra, Kərəm Aktürkoğlu və Barış Alpər Yılmazdan gedir. Düzdü, son 3 futbolçunun bu qış komandanı tərk edəcəyi o qədər də inandırıcı görünmür. Məsələn, “Atletiko” Kərəmlə, “Latsio” isə Barışla bağlı hələ son qərarını verməyib. Bu klublar bu oyunçuların inkişafını bir qədər də izləmək istəyir. Amma Nelssonla Boenin ayrılmaq ehtimalı yetərincə ciddidi. Özü də “Qalatasaray” bu iki futbolçunun satışından astronomik məbləğ – 40 milyon avro qazana bilər! “Sevilya” artıq aylardı gözünü Nelssondan çəkmir. “Cim-Bom 2026-ya qədər müqaviləsi olan Danimarka yığmasının üzvünü 25 milyon avrodan aşağı məbləğə buraxmaq niyyətində deyil. Boeyə görə isə ən çox canfəşanlıq edən klub “Sportinq”di. Bu mövsüm çox inamlı təsir bağışlayan və 2025-ci ilə qədər müqaviləsi olan sağ müdafiəçiyə görə lissabonlular bonuslarla birlikdə 15 milyon avro təklif edir. Fransalı futbolçu “Udineze” ilə “Lion”un da gündəmindədi. Patrik van Anholtla Haris Seferoviç isə çox güman, klubda son günlərini keçirir. Rəhbərlik onlardan qurtulmağın yollarını axtarır. Seferoviç zatən “Benfika”dan birilliyə icarəyə götürülüb.

Maraqlıdı ki, “Qalatasaray” onu geri qaytarmaq istəsə də, Portuqaliya nəhəngi bununla razılaşmayıb. Van Anholtla Seferoviçin zədələri olmadığı halda şənbə keçirilən “Girəsunspor”la matçın iştirak ərizəsinə salınmamaları bir daha gösətrir ki, bu futbolçular artıq Okan Burukun planlarına daxil deyil.