Fasilədən sonra doğma azarkeşləri önündə ilk oyuna çıxan “Kəpəz” “Qəbələ” ilə matçda qələbəyə yaxın olsa da, sonda istəyinə çata bilmədi.

Football-plus.az xəbər verir ki, ilk yarıda iki dəfə fərqlənən “sarı-göylər” 2-ci hissədə üstünlüyü qorumağı bacarmadı və qonaqlar hər iki qolun əvəzini çıxmaqla səfərdən 1 xalla döndü. 90 dəqiqənin tamamında hər iki komandanın oyunçuları üzgün görünürdü. Onlardan biri də Fərid Nəbiyev idi.

“Kəpəz”in yarımmüdafiəçisi jurnalistlərə müsahibəsində 2 xal itirdiklərini söylədi.

- Qələbəni əldən verməyinizin səbəbi nə oldu?
- Cəzalı futbolçularımızın sayı çox idi. Buna baxmayaraq, oyuna yaxşı başlamışdıq, fasiləyə qədər 2 qol vurmuşduq. Təəssüf ki, ikinci yarıda gücümüzü qoruya bilmədik və qapımızda 2 top gördük. Diqqətsizliyimiz bizə baha başa gəldi, qələbəni əldən verdik. Lakin “Qəbələ” kimi komanda ilə matçda 1 xal da pis nəticə deyil.

- 1 xal qazandız, yoxsa 2 xal itirdiz?
- 2 xal itirdik.

- Tərlan Əhmədov da səninlə eyni fikirdəydi?
- Təbii ki.

- Nəticə ilə razı deyildi?
- Tək Tərlan müəllim yox, hamımız üzgünük. Əlimizdə olan qələbəni buraxdıq. Açığı, belə olacağını ağlımızdan keçirmirdik.

- Fasilədən sonra komandaya nə oldu? Nə baş verdi?
- Dediyim kimi, cəzalı futbolçuların yoxluğu və ikinci yarıda yorulmağımız özünü göstərdi. Komandada yeni futbolçular var deyə, bir-birimizə hələ tam öyrəşməmişik.

- Baş məşqçinin ikinci hissə üçün tapşırıqları nədən ibarət idi?
- Topa daha çox nəzarət etməliydik. Lakin “Qəbələ” gücü və təcrübəsi ilə istəyimizi həyata keçirməyə imkan vermədi.

- Qazon ağır görünürdü. Rəqib komandanın baş məşqçisi Elmar Baxşıyev də bundan gileyləndi.
- Razıyam, burda oynamaq çətindi, qazon çox ağırdı. Məşqlərimizi də burda yox, süni örtükdə edirik. Bu məqamın özü də oyunumuza hansısa mənada təsir edir.

- Cari mövsümdə “Kəpəz”in heyətində ilk qolunu vaxtilə futbolçu kimi yetişdiyin “Qəbələ”nin qapısından keçirdin. Bu gün sabiq komandana qarşı üçüncü dəfə oynadın. Necə hissdi?
- Futbolçu həyatımın 8 ili “Qəbələ”də keçib. Əlbəttə, bu komandaya qarşı oynamaq içimdə qəribə hisslər yaradır. Amma bu futboldu. İşimiz elədi ki, bu gün burdayıq, sabah başqa klubda. Belə məqamlarda peşəkar olduğumuzu unutmamalıyıq. Hər komandaya qarşı eyni motivasiya ilə hazırlaşmalı, eyni istəklə oynamalıyıq.

- Çexiyada 5 il keçirəndən sonra Azərbaycana qayıdıb premyer-liqada qalmaq uğrunda mübarizə aparan komanda ilə anlaşdın. Karyerandan nə dərəcədə razısan?
- Bu dəqiqə mənim üçün vacib olan daha çox oyun təcrübəsi qazanıb karyeramı yenidən Avropada davam etdirməkdi. Hazırda “Kəpəz”in uğurlarını düşünürəm. Gələcəkdə nələrin baş verəcəyini zaman göstərəcək.

RƏŞAD