18 illik fasilədən sonra ölkəmizi avrokuboklarda təmsil edən “Sabah” hər kəsi təəccübləndirməyə davam edir.

"Football-plus.az" olaraq Boban Mitevin rəhbərlik etdiyi Azərbaycan çempionunun ilk qrup oyununda Niderland “Donar”ına 75:72 hesabıyla qalib gəldiyini xəbər vermişdik.

“Tələbələr” srağagün ikinci oyununu da keçirdi. Budəfəki rəqib Şimali Makedoniya təmsilçisi “Rabotniçki” idi. “Bayquşlar” çətin, amma vacib qələbə qazandı - 83:81. Komandamız bu gün keçirəcəyi sonuncu oyunda ilk iki oyunda uduzmayan Rumıniya təmsilçisi “Rapid”lə qarşılaşacaq. Bu oyun Bakı vaxtı ilə saat 19.30-da başlayacaq və İTV-nin “yutub” kanalı ilə canlı yayınlanacaq.

Bəs komandamızın təsnifat mərhələsini adlayaraq Avropa Kubokunun müntəzəm mövsümünə vəsiqə qazanmaq şansı nə dərəcədə realdı? Hazırda topların yaxşı fərqinə görə qrupun turnir cədvəlinə “Rapid” başçılıq edir. Xatırladaq ki, “Sabah”da top fərqi +5-di. Reqlamentə görə növbəti mərhələyə 7 qrupun qalibi və qruplarda 2-ci yeri tutan ən yaxşı iki komanda adlayacaq. Təsnifat mərhələsində vəziyyət qarışıqdı. Təkcə bir məqamı xatırladaq ki, “Sabah”ın qrupunda 4 komanda yer alsa da, qalan qruplarda üç komanda mübarizə aparır. 2-ci yeri tutub kənarda qalmamaq üçün “Sabah” bu gün istənilən halda qələbə uğrunda oynamalıdı.

Onu da xatırladaq ki, ölkə çempionu təsnifatda 1-ci yeri tutacağı təqdirdə növbəti mərhələdə D qrupunda aşağıda adı çəkilən komandalarla birgə yer alacaq: “Mornar” (Monteneqro), “Baxçaşəhir” (Türkiyə), “Nimburk” (Çexiya).