"Bu bizə baha başa gəlir"
Misli premyer-liqasının 9-cu turunda "Zirə" "Turan Tovuz"u məğlub edib - 2:1.
"Football-plus.az" xəbər verir ki, matçdan sonra qərblilərin çalışdırıcısı Ayxan Abbasovun mətbuat konfransı keçirilib. Sizi mütəxəssisin fikirləri ilə tanış edirik:
"Üzücü məğlubiyyət oldu. Futbolçular meydanda çox əziyyət çəkdilər. Birinci yarıda lazım olan epizodda diqqətsizlik etdik, ikinci yarıda oyunu bərabərləşdirdik, üstünlük də bizdə idi. Amma standart vəziyyətdən yenə qol buraxdıq. Qoldan qabaq rəqib hücumçu müdafiəçimizə dirsək atmışdı. Neçə oyundur ki, penaltilərimizi vermirlər, xırda foullara baxmırlar. Bu da bizə baha başa gəlir. Xallar qazana bilmirik. Futbolçulardan oyun baxımından razı qaldıq. Sonluq çatmadı. Bu da düzələcək. Ruhdan düşmək olmaz. İlk dövrədə 11 xal qazandıq. Çox da ola bilərdi. Demək ki, ikinci dövrə daha çətin keçəcək. Ağır qrafikə girəcəyik. Komandama inanıram. Fasilədən istifadən edib yaxşı hazırlaşmaq lazımdı. Zədəlilərimiz də var idi".
- Qapıda dəyişiklik etmişdiz. Xüsusi səbəb var idi?
- Xeyr. Tərlan da bizim əsas qapıçımızdı. Normal çıxış etdi. Qollara baxsaq, arxa küncə vuruldu. Böyük iş olmadı.
- Otto Con və Martin Petkov mövsümə çox yaxşı başlamışdı. Amma performanslarında eniş yaşanır. Nə baş verib?
- Çempionat uzun marafondu. Futbolçularda belə hallar olacaq. Petkov sezona yaxşı başlamışdı, gəncdir, böyük potensialı var. Bax, ona görə geniş heyət istəyirik ki, rotasiyalar edə bilək. Paçu özü də ağır zədədən qayıdıb. Yavaş-yavaş özünə gəlir. Futbolçular formada olanda, komandaya təsir edir. İnanırıq ki, onlar özlərinə gələcək.
Digər xəbərlər
