"Meydanda istədiyimiz oyunu görməyə başlayırıq" - Ayxan Abbasov
Misli premyer-liqasında 14-cü turun oyunları keçirilir.
"Kəpəz" "Turan Tovuz"u qəbul edib. Hesabın açılmadığı matçdan sonra qonaqların çalışdırıcısı Ayxan Abbasovun mətbuat konfransı keçirilib. Sizi mütəxəssisin fikirləri ilə tanış edirik:
"Gəncədə oynamaq xoşdu. Gözəl atmosfer var idi. Hər iki komandanın azarkeşləri yaxşı ab-hava yaratmışdı. Ağır qrafikdə idik. Oyunların yorğunluğundan əlavə çoxlu zədəlilərimiz var. Bu gün risk etdik. Bəziləri yenidən zədələnə bilərdi. Oyunun mahiyyətini bilirdik. Bizə xal lazımdı. Aşağı pillələrdəki rəqiblər yaxınlaşır. Mübarizəli matç oldu. Belə oyunlarda epizodlar az olur. Məncə, yaxşı 1 xal qazandıq. Çünki fərqi qoruya bildik. Fasilədə futbolçularımızın geri qayıtmasına çalışacağıq. Meydanda istədiyimiz oyunu görməyə başlayırıq. Qarşıdakı oyunlara baxacağıq".
- Fasilədə Şəhriyar Əliyevi əvəzləməyiniz zədəsi ilə bağlı idi?
- Şəhriyar 3 matçdı ki, ağrı ilə oynayır. Həmişə qoruyurduq. Bu gün onu daha uzunmüddətli itirə bilərdik. Belə oyunda stopperi çıxarmaq böyük riskdi. Müayinədən sonra durumuna aydınlıq gələcək.
- “Qarabağ”la matçdan sonra “Kəpəz”lə görüşün ağır keçəcəyini demişdiz. Həmin çətinliyi gördüz?
- Son matçlarda “Kəpəz” xallar qazanır. Həm “Neftçi”, həm “Səbail”lə ev oyununda yaxşı çıxış ediblər. Çempionatda asan oyun yoxdu. Xal, qələbə üçün çox əziyyət çəkmək lazımdı. “Kəpəz”in çevriliş etmək istəyəcəyini bilirdik. Qalib gəlsəydilər, yaxınlaşırdılar.
- “Şamaxı”, “Qarabağ” və “Kəpəz”lə görüşlərdə xal hədəfiniz nə idi və nəyə nail ola bildiz?
- Konkret qarşımıza xal hədəfi qoya bilmirik. Bu, bir az çətindi. Gələcəkdə daha büdcəli olsaq, geniş heyətlə daha yaxşısına nail olmaq olar. 4 xal yığa biləcəyimizi fikirləşirdik. “Şamaxı” ilə matçda da 1 xal olsaydı, daha yaxşı olardı.
- Fasilədən sonra kubok oyunları olacaq. Bu turnirdə nə gözləyirsiz?
- Fasilə oyunçuların zədədən qayıtması üçün önəmli olacaq. İki cəbhədə oynamaq çətindi. “Şamaxı” ilə oyunda tam “Turan Tovuz”u görmək istəyirəm.
