Misli premyer-liqasında 20-ci tura start verilib.

"Sumqayıt" "Turan Tovuz"u qəbul edib - 2:1. Oyundan sonra qonaqların çalışdırıcısı Ayxan Abbasovun mətbuat konfransı keçirilib. Sizi mütəxəssisin fikirləri ilə tanış edirik:

- İkinci hissənin ortalarında müdafiədə sanki durğunluq yaranmışdı. Bu, nə ilə bağlı idi?
- Belə bir şey yadıma gəlmir. Rəqibin sürətli hücumunda bəzən arxaya qayıtmaq çətin olur. Bütün komanda ilə irəli atılmışdıq. Sona qədər mübarizə apardıq. Rəqibin əks-hücumları gözlənilirdi.

- İkinci dövrədə "Sumqayıt"a qalib gəlmişdiz. Bu gün sizə qarşı xüsusi motivasiya ilə çıxdıqlarını düşünmürsüz?
- Xeyr. Onların da xala ehtiyacı var. Hər oyun motivasiyadı. İki komanda da yaxşı mübarizə apardı.

- Rəqibləriniz xal baxımından sizə çatır. Gərginlik yoxdu?
- Son 5 pillədəki komandaların gücləri bərabərdi. Belə oyunlarda məğlub olmaq olmaz. İşimiz daha da çətinləşdi.

- Son saniyədə qaçan qol imkanı zamanı hansı hissləri keçirdiniz?
- Futbolçular ruhdan düşmədi. Yaxşı imkanlarımız oldu. Belə vəziyyətlərdə soyuqqanlı olmalıyıq.

- Hesabdan başqa sizi narazı salan məqam nə oldu?
- İki oyundur sadə səhvlər edirik və bu, məğlubiyyətə səbəb olur. "Qarabağ"la oyunda da ani top itkisindən sonra qol buraxdıq.

- AFFA bu gün klubu 5600 manat cərimələdi. Buna münasibətiniz necədi?
- Bizim kimi az büdcəli klublara belə şeylər çox təsir edir. Çətin vəziyyətə salır. Gərək azarkeşlərimiz də daha diqqətli olsunlar.