"Xırda səhvlər sonda nəticəyə təsir edir"
Misli premyer-liqasında 6-cı turun oyunları keçirilir.
"Football-plus.az" xəbər verir ki, "Turan Tovuz" "Qəbələ"ni qonaq edib - 2:2. Matçdan sonra meydan sahiblərinin çalışdırıcısı Ayxan Abbasovun mətbuat konfransı keçirilib. Sizi mütəxəssisin fikirləri ilə tanış edirik:
"Oyunun belə gərgin keçəcəyini bilirdik. Çünki, hər iki komandaya xal lazım idi. Heç kim uduzmaq istəmirdi. Böyük üstünlük əldə etdik. Təəssüf ki, bir neçə dəqiqəlik futbolçularımızda konsentrasiya aşağı düşdü. Bu gün çoxlu qol epizodlarımız oldu. Oyunun qəhrəmanı rəqibin qapıçısı idi. Məni sevindirən odu ki, futbolçular istədiklərimizi edə bilir, epizodlar yaradırlar. Bunu davam etdirmək lazımdı. Çempionatda hər xal önəmlidi. Yolumuza davam edəcəyik".
- Son dəqiqələrdə qapıçınız sanki vaxt aparırdı. Bu, nə ilə bağlı idi?
- Qapıçılarda o hissiyyat var. Müdafiəçilərin yorğunluğu görünürdü. Bu, o demək deyil ki, biz vaxt uzadırıq. Ani an idi, bir dəfə oldu.
- Bu cür oyunda xal itkisinin səbəbi nədi?
- Əlbəttə 0:2-dən sonra rəqib hesabı bərabərləşdirirsə, deməli səhvlərimiz var. Oyunu sakitləşdirmək lazım idi. Rəqib də hücum xəttində iki dəyişiklik etdi. Müdafiəçilərimizin yorğunluğundan istifadə etdilər.
- Belajdi Pusi qol vurandan sonra aqressiv görünürdü. Bu, nə ilə bağlı idi?
- Bəli, mən də ona iradımı bildirdim. Elə anlarda daha sakit olmaq lazımdı. İkinci sarı vərəqəni ala bilərdi. Araşdırsaq, xırda səhvlər sonda nəticəyə təsir edir.
