"Qarabağ" Avropa Liqasının 2-ci turunda "Həkken"i məğlub edib - 1:0.

"Football-plus.az" xəbər verir ki, matçdan sonra ağdamlıların çalışdırıcısı Qurban Qurbanovun mətbuat konfransı keçirilib. Sizi onun fikirləri ilə tanış edirik:

- Futbolçular tapşırıqlarınızı tam yerinə yetirdilər?
- Ümumən pis alınmadı. Rəqibin topla yaxşı davranan və sürətli oyunçuları var. Bəzi epizodlarda onları gözdən qaçırdıq. Biz get-gedə oyunu ələ ala bildik. Qalib gəlmək istəyiriksə, daha diqqətli və aktiv olmalıyıq. Futbolçular bəzi epizodlarda düzgün oynamadıqlarını başa düşdülər. Amma ümumən oyundan razı qaldım.

- Qarşıda "Bayer"lə oyun var. Bu matç haqda fikirləriniz necədi?
- Hər matçda daha ciddi olmalıyıq. Uğur əldə edirsənsə, rəqiblər sənə qarşı daha ciddi hazırlaşır. Həmişə güclü rəqiblərə qarşı oynamağımızı istəmişəm. Bu, həmişə bizə faydalı olacaq. "Bayer" də ən pik formasındadı. Öz oyunumuzdan əl çəkməməyə çalışacağıq. Rəqibi tam yaxından analiz edəcəyik. Yaxşı oyun və mübarizə göstərmək niyyətindəyik.

- Bədavinin əvəzlənməsi nə ilə bağlı idi?
- Bədavinin əzələsində ağrı oldu. Özü əvəzlənməsini istədi.

- Maksimin qapıya gedən topun qarşısını alması matçın qırılma nöqtəsi idi?
- Bu, hər futbolçunun etməli olduğu işdi. O epizod olmamalı idi. Amma belə şeylər futbolçunun üstün keyfiyyətini göstərir və komandanın özünəinamını artırır.

- Bu gün erməni təxribatı gözlənilirdi. Bu, futbolçulara necə təsir edir?
- Belə şeylər olanda biz daha inamlı olmuşuq. Biz peşəkarıq. İşimiz meydanda futbol oynamaqdı. Hər oyunda təxribatların qarşısını almaq üçün UEFA tədbirlər görür. Düzdü, bəzi hallarda təxribat baş verib. Bu ölkədə hər şey bizim üçün xoş oldu. Bizim üçün heç bir vətəndaşın fərqi yoxdu, hamıya hömətlə yanaşırıq. Həmişə başımız dik olub. Bu cür hallar bizə təsir etmir.

- Müdafiənin sağ cinahında problem görünürdü. Marko Veşoviç nə vaxt qayıdacaq?
- Bir aya hazır olacaq. Hazırda o mövqedə Mateus oynayır. Onun komandaya faydası çoxdu. Tapşırıqları layiqincə yerinə yetirir. Bəzən böyük oyunlarda təcrübə vacibdi.

- Bəhlul Mustafazadənin durumu necədi?
- Ayağında sınıq var idi. Sağalması vaxt tələb edir.