Sabah “Qarabağ” Avropa Liqasının pley-offunda “Olimpiya”nı qonaq edəcək.

“Football-plus.az” xəbər verir ki, Lyublyana təmsilçisi ilə görüşdən öncə ağdamlıların çalışdırıcısı Qurban Qurbanovun mətbuat konfransı keçirilib. Sizi mütəxəssisin fikirləri ilə tanış edirik:

“Qrup öncəsi son oyunumuzdu. İlk matçda qalib gəlmişik. Amma bu komandaya qarşı Bakıda daha da ciddi olmalıyıq. Çünki öz oyun üslubları var. Ona görə də heç bir an boşalmaq olmaz. "Olimpiya"nın son çempionat matçına baxdıq. Uduzdular, amma hesab fərqli olmalı idi. Şanslardan istifadə edə bilmədilər. Futbolçuları bu oyuna tam kökləməyə çalışmışıq. Sabah yaxşı oyun və yaxşı mübarizə aparıb, sərfəli nəticə əldə etməyə çalışacağıq. Futbolçularıma inanıram, güvənirəm”.

- Sabah sizə ən yaxşı oyununuzu göstərməyə nə mane ola bilər?
- Tam açıqlaya bilmərəm. Hesab bizi aldatmalı deyil. "Olimpiya"nın potensialı çox yüksəkdi. Sabah onlar çəkinməyəcək, riskə gedəcəklər. Biz daha aqressiv və ciddi olmalıyıq. Başqa şey haqda düşünməli deyilik. Futbolçular daha yaxşı bilir. Oyunu analiz etdik. Gördülər ki, 2:0 hesabı ilə qalib gəlsək də, asan olmayıb. Oyunun içində olmalıyıq.

- Bədavi Hüseynov və Patrik Andrade nə vaxt qayıdacaq?
- Vaxt var hələ. Patrik iki həftədən tez qayıtmayacaq. Bədavi də bəlkə iki həftə sonra məşqlərə başlayacaq. Yüngül zədələr deyil. Hər ikisində cidddi.

- Transfer işlərində aktivlik var?
- Biz aktivik. Nəzərdən keçiririk. Sadəcə son günlərdə "rəqib" tərəfdən passivlik var. Son ana qədər iş başında olacağıq. Bizə uyğun, faydalı oyunçu olsa, mütləq komandamızda görmək istəyərik. Futbolçular sıx qrafikdə oynayırlar. Ona görə əldə daha çox oyunçuya ehtiyac var. Komandanı gücləndirmək barədə indi daha çox düşünürük.