Konfrans Liqasında pley-off mərhələsinə start verilib.

"Qarabağ" "Gent"i məğlub edib - 1:0. Oyundan sonra ağdamlıların çalışdırıcısı Qurban Qurbanovun mətbuat konfransı keçirilib. Sizi mütəxəssisin fikirləri ilə tanış edirik:

- Yeni transferlərin oyununu necə dəyərləndirirsiz?
- Hər birindən razı qaldım. Əlbəttə, tam istədiyim performansda deyillər, optimal formalarından uzaqdılar. Bir az vaxt lazım olacaq. Ümumən, işlər heç də pis getmir. Hər biri çox məsuliyyətli futbolçulardı. Bu gün meydanda olan bütün oyunçular qələbə üçün var-gücünü qoydu.

- “Qarabağ” adətən qısa paslarla oynayırdı. Bu gün isə qapıdan uzun ötürmələr etdiz. Bu, Şahruddin Məhəmmədəliyevin yoxluğu ilə əlaqədar idi, yoxsa rəqibə uyğun seçim etmişdiz?
- İlk hissədə çox da risk etmədik. Fasilədən sonra bəzi epizodlarda etdik. Rəqib 90 dəqiqə aqressiv pressinq edirdi. Geri addım yox idi, ancaq irəli çıxırdılar. Buna görə uzun toplar üzərində çox çalışmışdıq. Rəqibin hücum potensialı çox yaxşıdı. Buna görə rəqibi qapımızdan uzaqda saxlamağa çalışırdıq.

- Rəqib baş məşqçi qapıçı seçiminizi gözləmədiyini söylədi. Luka Quqeşaşvili seçimi nə ilə bağlı idi?
- Buna dəqiq cavab verə bilməyəcəm. Oyundan oyuna hər futbolçunun psixoloji durumuna baxırsan. Elə oyunçu var, hansısa matçda “yana” bilər. Amin Ramazanov əvvəlki matçlarda çıxış edirdi. Oyunlar keçdikcə həyəcanının çoxaldığını görürdük. Sonra belə qərar verdim. Ola bilər, təcrübə daha çox rol oynasın. Aminə güvənirik. Bəzi xırda detalları deməməyim daha doğru olar. Bəzən qapıda belə dəyişikliklər etmişəm.

- Ramil Şeydayev çempionatda penaltilərin əksəriyyətindən yararlanır. Bu gün uğursuz oldu. Psixoloji durumu necədi?
- İndi normaldı. Oyundan sonra onun durumunu düzəltməyə çalışdım. Futboldu. Son penaltiləri dəqiq yerinə yetirirdi. Belə hallar da olur. Futbolun özəlliklərindən biridi. Məncə, problem olmayacaq. Çalışıb oyundan qol vurmaq lazımdı. Məncə, bunun qarşıdakı oyunda ona faydası olacaq.

- Leandro Andrade Kadinin boşluğunu doldura bilirmi?
- Heç vaxt olmayıb ki, gedən oyunçunun yerini kiminsə doldurması, problemlər barədə düşünüm. İstəmişəm ki, əlimdə olan futbolçular hamısı sağlam olsun. Məni narahat edən ən başlıca amil bu olub. Heyətdə çox dəyişiklik var idi. Kevin Medina cəzalı idi, Kadi, Kvabena Ovusu, İbrahima Vaci gedib, Filip Ozobiç zədəlidi. Ümumən, dəyişikliklər çox olub. Əlimizdə olan futbolçuların üstünlüklərindən istifadə etməyə, onları daha yaxşılaşdırmağa çalışırıq. Kadidən razı idim. Bu gün Leandro Andradedən də razıyam. Mənim üçün vacib olan ürəkli olmaq, tempdən düşməmək, rəqibdən çəkinməmək idi. Andradeni Kadi ilə müqayisə etmək istəmirəm.