Srağagün və dünən Liqa kubokunda 1/16 final mərhələsinin oyunları keçirildi.

"Football-plus.az" xəbər verir ki, dünənki oyunlarla bağlı növbəti sayımızda danışacağıq. Srağagün isə premyer-liqa iki təmsilçisini itirdi. “Vulverhempton” “İpsviç”lə, “Luton” “Ekseter”lə dueldən məğlub ayrıldı. Əvvəlki mərhələdə elita klublarından “Tottenhem”, “Nottingem Forest” və “Şeffild Yunayted” də mübarizəni dayandırmışdı.

Turnirin son qalibi “Mançester Yunayted” isə yeni mövsümə də qələbə ilə başladı. Mankunianlar möhkəm komandalardan sayılan “Kristal Pelas”ı darmadağın etdi. İlk dəqiqələrdən inamlı təsir bağışlayan meydan sahibləri yarım saat bitməmiş iki qol vurdu. Qonaqlar əvvəlcə cərimə meydançasının mərkəzinə şığıyan Qarnaçonu gözdən qaçırdı. Təzyiqi davam etdirən mankunianlar 6 dəqiqə sonra növbəti dəfə fərqləndi. Mauntun yerinə yetirdiyi künc zərbəsi zamanı Kazemiro müdafiəçiləri qabaqladı. Fasilədən az sonra meydan sahibləri hesab arasındakı fərqi darmadağın həddinə çatdırdı. Bu dəfə Kazemiro assistent rolunu oynadı. Marsyal braziliyalının uzaq dirək önünə ötürməsini qolla tamamladı. Təbii ki, bununla da oyunun taleyi həll olundu. Hər iki məşqçi qalan vaxt ərzində taktiki eksperimentlərlə başını qatdı. Həm də qapıçılara özünü göstərmək növbəsi çatdı. Onana iki dəfə Mateta ilə dueldən qalib ayrılmaqla intriqanın bərpasına imkan vermədi. Qonaqların qapıçısı Constoun da öz novbəsində bir neçə çətin zərbənin qarşısını aldı. Beləliklə, MY titulunu qorumaq yolunda ilk addımı atdı. “Kristal Pelas” isə bu acı məğlubiyyətin əvəzini çempionatda çıxmağa çalışacaq. Sentyabrın 30-da bu iki komanda premyer-liqanın 7-ci turu çərçivəsində yenə də “Old Trafford”da üz-üzə gələcək.

1/16 final
Mançester Yunayted – Kristal Pelas 3:0
Qarnaço, 21. Kazemiro, 27. Marsyal, 55.
MY: Onana, Dalot, Maquayr, Varan (Evans, 61), Amrabat (Qor, 61), Kazemiro, Mejbri (Van de Beek, 71), Pelyistri, Maunt (Lindelöf, 46), Qarnaço, Marsyal (Heylunn, 75).
İpsviç (D-2) – Vulverhempton 3:2
Jiro-Hatçinson, 28. Ladapo, 39. Teylor, 58 – Hi Çan Hvan, 4. Toti, 15.
Ekseter (D-3) – Luton 1:0
Mitçell, 84.
Solford Siti (D-4) – Bernli 0:4
Berq, 12. Bruun-Larsen, 20. O`Şi, 27. Odobert, 84.
Port Veyl (D-3) – Satton Yunayted (D-4) 2:1
Tomas, 49. Oyo, 83 – Koli, 70.
Bredford (D-4) – Midlsbro (D-2) 0:2
Latte Lat, 21. Rocers, 54.
Mensfild (D-4) – Piterboro (D-3) 2:2, p. – 3:1
Suon, 5-p. Eykins, 90+3-p. – Klark-Harris, 30; 47.
Brentford – Arsenal 0:1
Nelson, 8.
Çelsi – Brayton 1:0
Cekson, 51.
Nyukasl – Mançester Siti 1:0
İsak, 53.
Aston Villa – Everton 1:2
Kamara, 84 – Qarner, 15. Kalvert-Lüin, 50.
Liverpul – Lester (D-2) 3:1
Qakpo, 48. Soboslai, 70. Jota, 89 – Makeytir, 3.
Fulhem – Norviç (D-2) 2:1
Vinisius, 12. İvobi, 72 – Seyns, 75.
Linkoln (D-3) – Vest Hem 0:1
Souçek, 70.
Bornmut – Stok Siti (D-2) 2:0
Solanke, 51. Rotvell, 54.
Blekbern (D-2) – Kardiff (D-2) 5:2
Qarrett, 13. Siqurdsson, 36. Moran, 49; 54. Markandey, 69 – Robinson, 18. Etete, 45+3.

Fakt
“Mançester Yunayted” cari mövsümdə ilk dəfə ardıcıl iki oyunda qələbə qazandı. “Qırmızı şeytanlar” sentyabrın 23-də premyer-liqada “Bernli” üzərində qələbəyə sevinmişdi. Son iki oyuna qədər isə “Yunayted” mövsümün yalnız bir oyununda – startda “Vulverhempton”la görüşdə (1:0) qapısını toxunulmaz saxlamışdı. Ardından komanda 5 oyunda 14 qol buraxmışdı.

Oyundan sonra
Erik ten Haq, MY-nin baş məşqçisi: “Yaxşı oynadıq və dominantlıq etdik. Məhz elə buna bel bağlayırdıq. Qələbə qazanmırsansa, əlbəttə, məyusluq və kədər yaranır, əhval-ruhiyyə aşağı düşür. Ancaq biz həmişə ruhumuzla seçilmişik – bu gün də göründü. “Bernli” ilə oyunda müdafiə olunmaq və kollektivçilik baxımından irəliyə addım atmışdıqsa, bu gün də topla oynamaq baxımından irəlilədik. Hələ çox iş görməliyik, ancaq irəli addımlamaqdayıq. Amrabatın müdafiənin solunda oynamağa qadir olduğunu bilirik. Onun lazımi ustalıq səviyyəsi var, komandaya enerji verir. Gözlənildiyi kimi, Maquayr da çox etibarlı idi. Meydanda olan gənc oyunçularımız inkişaf etdikərini göstərdilər. Mənlə işləyən futbolçu elə-belə şans qazana bilməz, bu şansı haqq etmək lazımdı. Sançoya gəlincə, hər şey onun özündən asılıdı”.