Misli premyer-liqasının 7-ci turunda "Zirə" - "Neftçi" qarşılaşmasını mərkəzi oyun hesab etmək olardı.

Hər ikisi çempionluq və avrokuboklara vəsiqə uğrunda mübarizə aparır. Əslində bu oyun həm də psixoloji cəhətdən üstünlük qazanmaq baxımından önəmli idi. Buna "ağ-qaralar" daha böyük ehtiyac duyurdu. Amma Adrian Mutunun rəhbərlik etdiyi flaqman donanması bu dəfə də qayalara çırpıldı. "Qartallar" hesabda geri olduqları oyunda fasilə ərəfəsində “status-kvo”nu və yekunda tablodakı nəticəni təmin etməklə psixoloji üstünlüyü daha da yaxşılaşdırdı. Çoxları qəsəbə təmsilçisindən belə uğur gözləməsə də, reallıq budu ki, "Zirə" 7 turdan sonra turnir cədvəlində vahid liderdi. Rəşad Sadıqovun yetirmələri nə qədər uğurlu çıxış etsə də, heyətlərində, əsasən də hücum xətdində kasadlıq görünməklə yanaşı, hər oyundan sonra qeyd olunan çatışmazlıq daha da qabarır. Bu yüksək sürətlə irəliləyən avtomobilin getdikcə təkərlərinin boşalmasına və hissələrinin dağılmasına bənzəyir. Ümumi götürəndə "qartallar" yayda nə qədər güclənsə də, "yarpaq tökümü"nün fəsadlarını tam aradan qaldıra bilmədi. Hücum xəttində rəqabətin olmaması barədə ötən dəfə geniş yazmışdım. Transfer yetərsizliyi, hücum potensialında rəngarəngliyin olmaması, komandanın tam formalaşmaması Rəşad Sadıqovun fərqli taktika seçməsinə gətirib çıxarıb. Yığmanın sabiq kapitanı mübariz oyun sayəsində yaxşı nəticələr qazanmaqla motivasiyanı artırmaq və taktiki gedişlərə (top saxlamaq, hücuma çıxmaq şansı əldə edəndə riskə getməyib rəqibi topsuz qoymaq, tempi öldürmək, vaxt uzatmaq və s.) yer verməklə çatışmazlığı ört-basdır etmək istəyir. Məhz "ağ-qaralar"la oyundan sonra "heç-heçə bizim üçün qələbəyə bərabərdi, ona görə də nəticədən razı qaldım" deməsi də yuxarıda qeyd etdiklərimə dəlalət edir.

"Qartallar" "Neftçi"dən xal almaqla əsas rəqiblərindən daha birini sıradan çıxardı. Buna qədər "Qarabağ"ı, "Sabah"ı, "Səbail"i məğlub edən "Zirə" xallarla yanaşı, psixoloji güc qazanır. Ən azı ilk dövrədə adı çəkilən güclülərlə görüşlərdə zirəlilərin üstünlüyü qarşıdakı matçlarda özünəinamı daha da artıracaq. Şəxsi oyunların vacibliyini də nəzərə alsaq, qəsəbə təmsilçisi bir addım öndədi. Ötən mövsüm "Qəbələ"nin avrokuboklara gedən yolda "Zirə"ni şəxsi oyunlarda üstələməsi böyük rol oynadısa, indi "Zirə" şəxsi oyunlarda da üstünlük qazanmağa çalışır.

"Molde" ilə oyun daxil son üç görüşdə qələbələri sıralaması “Qarabağ”ın liderlik iştahını artırıb. Ağdamlılar hazırkı tempi qorusa, çətin ki, çempionatda kimsə onların qarşısını ala bilsin. "Bayquşlar"la "ağ-qaralar" qara zolaqda olsalar da, ilk dövrədəki uğursuzluqlardan nəticə çıxararaq 2-ci dövrədə aqressivcəsinə hər oyuna 3 xal qoparmaq üçün çıxacaqlar. Yəni "Sabah"la "Neftçi" aylarla şikar tapa bilməyən pələng quruda ən böyük olan fillərin üzərinə hücum çəkdiyi kimi irəli atılacaqlar. "Səbail"in futbolçuları Şahin Diniyevin tapşırıqlarını hələ ki ehtiyatla, amma uğurla yaşıl meydanda yerinə yetirməkdədi. "Dənizçilər" oyundan-oyuna artırırlar. "Qəbələ" də gec-tez özünə gələcək. "Araz-Naxçıvan" hər oyunda yaradıcı oyun sərgiləməklə maksimum xal qoparmağı hədəfləyir. "Sumqayıt"da Samir Abasov kimi iddialı məşqçinin olması "kimyaçılar"ın istənilən rəqibə başağrı yaradacağı deməkdi. Bir halda ki “Kəpəz” 5 xalı "Neftçi", "Qarabağ", "Sabah" kimi komandaları büdrətməklə qazanıb, gəncəlilər haqda da uzun danışmağa ehtiyac yoxdu.

"Zirə" hələ ki liderdi, amma dalana doğru addımlayır. Odu ki, qəsəbə təmsilçisi qısa zaman kəsiyində heyətinə 2-3 hücumçu və ya hücumda oynaya biləcək oyunçu qatmalı, müdafiə ilə yarımmüdafiə xətdindəki futbolçuların zəif performansını yüksəltdirməklə məşğul olmalıdı. Əks təqdirdə "qartallar"ın uğurlu startı tədricən tənəzzüllə müşayiət olunacaq. Rəşad Sadıqov həm öz komandasının, həm də rəqibinin hər birinin çıxışlarını dərindən təhlil etməklə fəth etdiyi mövqeləri qorumalıdı. Qısası, uzaqgörənliyini işə salmalıdı.

ABDULLA İSMAYILOĞLU