PFL “Qəbələ”yə problem yaradıb - AÇIQLAMA
“Qəbələ-2” Gənclər Liqasının 1-ci mərhələsinin ilk oyununda “Puşkaş Akademiyası” (Macarıstan) ilə qarşılaşacaq.
“Football-plus.az” xəbər verir ki, oktyabrın 4-də keçiriləcək matça az qalıb. Bunu nəzərə alaraq komandanın baş məşqçisi Famil Xəlilovla əlaqə saxladıq. Mütəxəssisdən son durumla bağlı məlumat aldıq. Onun “Football-plus.az”a söylədikləri:
“Şükür Allaha, hər şey yaxşıdı. Rəqibi tam təhlil etmişik. İnanırıq ki, layiqli nəticəylə azarkeşlərimizi sevindirəcəyik. Hazırlıq prosesi tam sürətlə və məsuliyyətlə davam edir. Zədəlimiz yoxdu”.
Xatırlayırsızsa, komanda bu ev oyununa daha ciddi hazırlaşmaq üçün PFL-ə müraciət edərək matçların təxirə salınmasını istəmişdi. Çalışdırıcı bu mövzuyla bağlı maraqlı məsələni bizimlə paylaşdı:
“Biz əslində həm U-19-un, həm də Əvəzedicilər Liqasının görüşlərinin təxirə salınmasını istəmişdik. Nəticədə Əvəzedicilər Liqasında oktyabrın 2-ə təyin edilmiş “Kəpəz-2”ylə qarşılaşma sentyabrın 30-na razılaşdırıldı. U-19-un oyunları isə təxirə salındı. İstəyərdik ki, “Kəpəz-2” ilə oyun indilərdə keçirilməsin. Çünki 8 gündə üç oyun keçirmək çox çətindi. Yada salım ki, sentyabrın 26-da “Qarabağ-2”ylə də qarşılaşdıq”.
Famil bəyin komanda haqda fikirləri isə belədi:
“Yenə deyirəm, heyif ki, “Kəpəz-2” ilə oyunun təxirə salınmasını istəsək də, alınmadı. PFL təklifimizi qəbul etmədi. Düzdü, hazırda zədəlimiz yoxdu. Amma sözügedən matçda nələr yaşanacağını bilmirik. Ümumi durum yüksək səviyyədədi. Uşaqlar ciddi hazırlılq prosesindən sonra özünü yaxşı hiss edir. Qələbəyə köklənmişik”.
KƏNAN BAHADIR
Digər xəbərlər
