Famil Xəlilov: “Azı bir mərhələ keçmək niyyətindəyik”
Srağagün "Qəbələ"nin U-19 komandasının Gənclər Liqasındakı rəqibi bəlli oldu.
Belə ki, "qırmızı-qaralar" 1-ci mərhələdə Macarıstanın "Puşkaş Akademiyası” ilə üz-üzə gələcək. Xatırlayırsızsa, bölgə təmsilçi ötən mövsüm yarışda mübarizəni ilk mərhələdə dayandırmışdı. Komanda ilk oyunda 0:3, cavab görüşündə isə 1:2 hesablı məğlubiyyət yaşamışdı. Görəsən, "Qəbələ"nin budəfəki hədəfləri nədi? Heyətin son durumu necədi? Ümumiyyətlə, oyunlara hazırlıq necə gedir? Nəhayət, rəqib haqda nə demək olar?
Suallarımızı "Qəbələ" Futbol Akademiyasının baş məşqçisi Famil Xəlilova ünvanladıq. Mütəxəssis püşkün komandası üçün uğurlu olduğunu bildirdi:
"Potensial rəqiblər sırasında ən münasibi "Puşkaş Akademiyası" idi. Qarşı tərəfi təhlil etmək üçün kifayət qədər vaxtımız var. Onlar da bizim kimi gənc klubdu. Buna baxmayaraq, rəqibə hörmətlə yanaşırıq. Heç kimə sirr deyil ki, son iki mövsümdə çox güclü klublarla qarşılaşdıq. Bu dəfə ən azı bir mərhələ keçmək niyyətindəyik. İnanıram ki, çox çalışaraq məqsədimizə nail olacağıq”.
Çalışdırıcı komandanın son durumu haqda bunları dedi:
“Şükür Allaha, zədəlimiz yoxdu. Sadəcə, U-19 millisində də forma geyən oyunçular - Murad Musayev, Samir Ağayev və Elmir Hüseynli hərbi xidmətə yollandıqları üçün bizə kömək edə bilməyəcək. Qarşılaşmada iştirak edəcək futbolçuların, demək olar ki, 80 faizi əvəzedici komandada oynayır. Artıq liqada 5 tur geridə qalıb. Orda güclü rəqabətin olması oyunçular üçün çox yaxşıdı. Hazırda komandamdan razıyam. Zədələnməsələr və ya başqa problemlərlə qarşılaşmasaq, mərhələ adlamaq olar. İnşallah, ölkəmizi, klubumuzu layiqincə təmsil edəcəyik”.
Qeyd edək ki, "Qəbələ" "Puşkaş Akademiyasi" ilə ilk oyunu oktyabrın 4-də evdə keçirəcək. Cavabgörüşü isə oktyabrın 25-də səfərdə baş tutacaq. Cütün qalibi növbəti mərhələdə "Olimpiakos" (Yunanıstan) - "Leççe" (İtaliya) duelinin güclüsü ilə görüşəcək.
KƏNAN BAHADIR
Digər xəbərlər
