İyunun 16-sı ölkə futbolunda tarixi hadisə baş verdi.

Belə ki, AFFA İcraiyyə Komitəsinin iclasında 1-ci və 2-ci liqanın yaradılmasıyla bağlı qərar qəbul olundu. O vaxt AFFA-nın baş katibi Sərxan Hacıyev və PFL-in vitse-prezidenti Aslan Şahgəldiyev bu addımın əhəmiyyətli nəticələri olacağını və futbolumuzun inkişafını sürətləndirəcəyini demişdi. Bununla yanaşı, liqaların və klubların sayını artırmaqda məqsəd kütləviliyi təmin etmək, xüsusən də bölgələrdə azarkeşləri stadionlara cəlb etmək və futbola marağı artırmaq idi. Bilindiyi kimi, artıq hər iki liqada yeni mövsüm start götürüb. 1-ci liqada iki tur geridə qalıbsa, 2-ci liqada 4-cü tura bu gün yekun vurulacaq. Görəsən, futbol qurumları yuxarıda xatırlatdığımız hədəflərə nə dərəcədə nail olub? Futbolsevərlər yeni liqalara maraq göstərirmi? Bu sualın cavabını ilk növbədə PFL-in saytında yer alan protokollarda axtardıq. Hər iki liqada turlar üzrə ümumi tamaşaçı sayına nəzər salaq.

1-ci liqa
1-ci tur – 4475
2-ci tur – 1320
10 oyunu 5795 azarkeş izləyib ki, bu da hər oyuna orta hesabla 580 nəfər deməkdi.

2-ci liqa
1-ci tur – 3480
2-ci tur – 1475
3-cü tur – 1820
4-cü tur – 350
(ilk 6 matçın nəticəsidi. “Dinamo” – “Füzuli” oyunu bu gün keçiriləcək – red.)

27 oyunu 7125 azarkeş izləyib, bu da hər oyuna orta hesabla 264 nəfər deməkdi.

Beləliklə, 1-ci liqada ilk iki turun oyunlarını 5795, 2-ci liqada ilk dörd turun oyunlarını isə 7125 azarkeş izləyib. Maraqlıdı ki, elitaya vəsiqə uğrunda mübarizə aparan klubların oyununa maraq 2-ci turda 1-ci ilə müqayisədə kəskin azalıb. Görünür, ya komandalar, ya da təşkilatçılıqdakı çatışmazlıqlar elə ilk cəhddə futbolsevərləri küsdürüb. Əlbəttə, zaman keçdikcə tamaşaçı sayında artım istisna olunmur. İndidən turnirin özünü doğrultmadığını iddia edə bilmərik. Lakin ilk turla müqayisədə ikincidə azarkeş sayının 3 dəfədən çox azalması maraqlı məqamdı. Üstəlik 4475 rəqəmi sizi aldatmasın. Bunların 2500-ü Aran derbisində, yəni “Karvan” – “Mingəçevir” matçında, 1100-ü isə “Araz-Saatlı” – “İmişli” görüşündə qeydə alınıb. İkinci turdakı 1320 izləyicinin 600-ü “Mingəçevir” – “Qaradağ Lökbatan” oyununa gəlib.

2-ci liqada da sabitlik yoxdu. Gah azalan, gah artan tempin hansı yöndə davam edəcəyi bəlli deyil. Hər halda, ilk turda 3480 azarkeşdən 1100-ü “Şəki” – “Dinamo”, 550-si isə “Ağdaş” - “Şahdağ Qusar” matçını izləyib. 2-ci turda 1-ci liqanın həmin mərhələsindəki aqibət yaşanıb. Ümumi azarkeş sayı, demək olar ki, 3 dəfə aşağı düşüb. Xoşbəxtlikdən 3-cü turda azarkeş sayında müəyyən artım qeydə alınıb. Təəssüf ki, axırıncı nəticələr uzun sürməyən xoş gözləntilərə son verib. Azarkeş sayı “möcüzəvi” şəkildə 5 dəfə azalıb. Bunu hansısa faktla izah etmək çətindi. Bəlkə də lokal xarakterli antiterror əməliyyatı futbolsevərlərin diqqətini yayındırıb....

İndi isə bu rəqəmləri Misli premyer-liqasıyla müqayisə etmək vaxtıdı. Deməli, ilk 7 turda keçirilən 34 matçı (“Sumqayıt” – “Sabah” oyunu təxirə salınıb – red.) 48131 azarkeş izləyib. Bu, elitada hər oyunu orta hesabla 1416 nəfərin stadiondan izləməsi deməkdi. Göründüyü kimi, 1-ci və 2-ci liqa orta azarkeş sayı baxımından elitadan çox geridədi. Çox güman, aşağı dəstələrdə oyunların həftəiçi keçirilməsinin də belə nəticələrdə payı böyükdü. İstənilən halda, təşkilatçılara düşünmək üçün müəyyən material verdik. Sizli-bizli stadionlara daha çox azarkeşin gəlməsini istəyirik. Amma belə görünür ki, nələrisə dəyişmək lazımdı.

KƏNAN BAHADIR