AFFA İcraiyyə Komitəsinin son iclasında növbəti mövsüm premyer-liqada 10 komandanın iştirak edəcəyi haqda qərar qəbul olundu.

Bu istiqamətdə artıq bəzi proseslər başlayıb. Premyer-liqanın cari mövsümünün bitməsinə də 10 tur qalıb. Təxminən 2 aydan sonra çempionat başa çatacaq. Görəsən, yeni mövsümdə premyer-liqada iştirak etmək üçün 1-ci divizion klubları canfəşanlıq edirmi? Bu istiqamətdə hansı yeniliklər var? Suallara aydınlıq gətirmək üçün AFFA-nın Lisenziyalaşdırma Qrupunun rəhbəri Elçin Məmmədovla əlaqə saxladıq. Qurum rəsmisiylə prosesin hansı istiqamətdə davam etməsindən, çatışmazlıqların olub-olmamasından danışdıq.

- AFFA İcraiyyə Komitəsinin son iclasında qərar verildi ki, növbəti mövsüm premyer-liqada 10 klub iştirak etsin. Məsələ ilə bağlı son müraciət tarixi nə zamandı?
- Ötən ilin noyabrından 1-ci divizionda çıxış edən bütün klublar bizə müraciət edib. Təbii ki, burda söhbət əvəzedici komandalardan getmir. Mayda çempionatda iştirak etmək üçün kimlərə linseziya veriləcəyi bilinəcək.

- Yəqin müraciətlərlə tanışsız. Hansı çatışmazlıqların olduğunu deyə bilərsiz? Bununla bağlı indidən premyer-liqada iştirak etmək istəyən klublara xəbərdarlıq etmisiz?
- Belə deyək, hər bir meyarın öz tarixi var. Bunları bilmək istəsəz, AFFA-nın rəsmi saytında “lisenziya” bölməsi var. Ordan bütün tarixlərlə tanış ola bilərsiz. Hamı üçün əsas problem var. Bu tək bizdə deyil. Bütün Avropa ölkələrinin lisenziya məsələlərində əsas məqam maliyə meyarı ilə bağlıdı. Bəzən klubların borcları olur. Elələri var ki, vaxtında maliyə hesabatlarını hazırlayıb təqdim edə bilmirlər. Yəni bu, bütün dünya ölkələrində lisenziya verilməməsi ilə bağlı problemdi. Bizim klublara gəlincə, çatışmazlıqlar haqda danışmaq üçün hələ tezdi. Mart və aprel aylarında maliyyə sənədlərini təqdim edə bilərlər. Digər meyarlarla bağlı kimdəsə çatışmazlıq var idisə, əlaqə saxlayıb demişik ki, həll etsinlər. Bundan başqa, 1-ci divizionda çıxış edən və bölgələri təmsil edən klubların bazasında olduq. Bütün meyarlar üzrə onlara seminarlar keçdik. İşlər gedir, hansı klublar sona qədər lisenziya şərtlərini yerinə yetirə bilsələr, onlar da premyer-liqada çıxış edəcək.

- Premyer-liqaya yeni komandalar vəsiqə qazanandan sonra 1-ci divizionda da klub sayını artırmaq lazım olacaq. Adı çəkilən çempionatda iştirak etmək üçün Region Liqası təmsilçiləri hansı lisenziya şərtlərini yerinə yetirməlidi?
- Birinci divizionda hansısa şərt və tələb yoxdu. Bu səbəbdən də növbəti mövsüm orda iştirak etmək istəyən klublarla bağlı məlumatlı deyiləm.

- Belə çıxır ki, yeni yaranan istənilən klub 1-ci divizionda çıxış edə bilər?
- Xeyr! Mən belə söz demədim və iddia da etmədim. Sadəcə, 1-ci divizionda lisenziya tələbi olmadığını söylədim. Burda iştirak etmək istəyən klubların qəbulu ilə bağlı AFFA və PFL-dən soruşa bilərsiz. Çünki biz həmin komandaların rəsmiləri ilə nə danışırıq, nə də görüşürük. Birinci divizonda çıxış etmək üçün lazım olan tələbləri məhz PFL və AFFA bilir.

- Ötən ay bir məsələ ölkə futbolunun gündəmində idi. Yəqin “Xan Lənkəran” adlı klubdan xəbərdarsız. Region Liqasında çıxış edilər və yetərincə uğurludular. Onların prezidenti sosial şəbəkələrdə belə bir fikir irəli sürmüşdü ki, bizim istəyimiz 1-ci divizion yox, premyer-liqadı. Sualımız elə bu istiqamətdədi. Divizionda çıxış edən klublardan hansınasa lisenziya verilməsə, maddi-texniki problemləri olmayan, yetərincə yaxşı infrakstruktura malik “Xan Lənkəran” birbaşa premyer-liqada iştirak edə bilər?
- Çox nəzəri sualdı. Premyer-liqada və ya 1-ci divizionda çıxış etməyən klub lisenziya üçün müraciət edə bilməz. Qeyd edirsiz ki, adı çəkilən klub meyarların hamısını yerinə yetirə bilir. Buna kim qərar verəcək? Yenə deyirəm, çox nəzəri sualdı. İnanmıram ki, belə şey olsun. Amma ola bilər, AFFA İcraiyyə Komitəsi qərar versin ki, 1-ci divizionda çıxış etməyən klub birbaşa premyer-liqada oynasın. Bu isə Lisenziyalaşdırma Qrupuna aid olmayan məsələdi. Bu qərarı mən şərh edə bilmərəm. Bizdə belə bir hadisə baş verib. Klublardan birinə lisenziya verildi. Sonra həmin komanda mövsüm başlamamış çempionatda iştirakdan imtina edərək dağıldı. Daha sonra İcraiyyə Komitəsi icazə verdi ki, lisenziya almayan klub premyer-liqada çıxış etsin. Amma belə bir məsələ var idi ki, həmin komanda da mövsüm ərzində 1-ci divizionda oynamışdı. Başqa belə hal yaşanmayıb. Yəni dediyiniz bizdən asılı məsələ deyil.

İLKİN SULTANLI