Tur “Ştutqart”ın debütant “Darmştadt” üzərində inamlı qələbəsi ilə start götürdü.

“Football-plus.az” xəbər verir ki, 5 tura 12 xal şvabiyalıların XXI əsrdə ən uğurlu startıdı! Komanda sonuncu dəfə çempion olduğu 2006/07-də ilk 5 tura cəmi 7 xal toplamışdı.

Deyəsən, “Bavariya”nın bundesliqada yeni hobbisi yaranıb. Komanda ardıcıl 3-cü mövsümdü ilk dövrədə “Bohum” üzərində 7:0-lıq qələbə qazanır! Bu nəticə ötən mövsümün 3-cü turunda səfərdə, 2021/22-nin 5-ci turunda isə “Alyans Arena”da qeydə alınmışdı. Ümumiyyətlə, “Bohum” Münhendə güclü rəqibinə qarşı bundesliqada keçirdiyi 37 qarşılaşmanın yalnız birində (1991-in avqustunda) qalib gəlib. Topların daha yaxşı fərqinə görə liderliyi ələ keçirən “Bavariya” həm də bundesliqada evdə qol vurmaq seriyasını 60 oyuna çatdırdı! Bu, turnirin tarixinin ən yaxşı 3-cü göstəricisidi. Maraqlıdı ki, ən yaxşı 2 göstərici də məhz elə “Bavariya”ya məxsusdu (1979-82 62 oyun; 1970-74 64 oyun). Dortmund “Borussiya”sı çətinliklə də olsa, “Volfsburq”un müqavimətini qırmağı bacardı. Bundesliqada məğlubiyyətsiz seriyası 13 oyuna yüksələn “arılar”ın da qol seriyası davam edir. “Bavariya”nı bu göstəricidə qarabaqara izləyən “Borusiyya” evdə ardıcıl 54-cü çempionat oyununda qol vurmaqla şəxsi rekordunu bir qədər də yaxşılaşdırdı.

“Leyptsiq”, nəhayət, Münhenqladbax sindromuna son qoydu. “Öküzlər” son 3 mövsümdə bu şəhərdən məğlubiyyətlə qayıtmışdılar. Vernerin mövsümdəki ilk qolu tam yerinə düşdü. “Union”, deyəsən, yavaş-yavaş həm ÇL-də, həm də çempionatda oynamağın çətinliyini hiss etməyə başlayır. Ortabab heyətlə boyundan yuxarı tullanaraq ÇL-ə vəsiqə qazanan paytaxt təmsilçisi heç cür uğursuzluq zolağından çıxa bilmir. “Union” bu turu da xalsız başa vurmaqla ardıcıl 4-cü rəsmi oyunda uduzdu. “Hoffenhaym” “Bavariya”, Dortmund “Borussiya”sı və “Leyptsiq”dən sonra “Union”u bundesliqada səfərdə məğlub edən cəmi 4-cü komanda oldu. “Qarabağ”ın AL-in qrup mərhələsindəki rəqiblərindən olan “Bayer-04” növbəti dəfə inamlı qələbə qazandı. 5 tura 13 xal leverkuzenlilərin yeni rekordudu! Nigeriyalı forvard Bonifas bundesliqada 5-ci oyununda 3-cü dəfə dubl etdi. Turnirin tarixində daha öncə yalnız 2 futbolçu – 1976-da “Fortuna”nın üzvü Yan Mattsson və 2020-də “Borussiya”lı Erlinq Holann ilk 5 oyunda 3 dəfə dubl etmişdi. Almaniyanı avrokuboklarda təmsil edən komandaların - “Ayntraxt”la “Frayburq”un dueli qolsuz bitdi. İki qələbəsiz komandanın duelində isə “Auqsburq” “Maynts-05”dən üstün oldu. Yeri gəlmişkən, onu da bildirək ki, bundesliqa tarixində ilk dəfə 5-ci turdan sonra 5 komanda hələ də qələbəyə həsrətdi.

5-ci tur
Bavariya – Bohum 7:0
Çupo-Motinq, 4. Keyn, 12; 54-p.; 89. De Liqt, 29. Sane, 38. Tel, 81. (75000)
Bavariya: Ulrayx, Mazraui, De Liqt (Upamekano, 46), Kim Min Çje, Devis (Kratsiq, 65), Kimmix (Qoretska, 77), Laymer, Sané, Çupo-Motinq (Tel, 65), Koman (Müller, 77), Keyn.

Borussia D – Volfsburq 1:0
Roys, 69. (81365)
Borussiya: Kobel, Ryuyerson, Hummels, Şlotterbek, Bensebayni, F.Nmeça, Salih Özcan, Roys (Əmrə Can, 83), Bayno-Gittens (Malen, 63), Brandt, Füllkruq (Alle, 78).

Borussiya M – Leyptsiq 0:1
Verner, 75. (50122)
Leyptsiq: Blasvix, Henrixs, Simakan, Lukeba, Raum, Simons (Zayvald, 84), Şlager (Klostermann, 84), Kampl, Karvalyo (Baumqartner, 70), Openda (Poulsen, 69), Şeşko (Verner, 70).

Union – Hoffenhaym 0:2
Kramariç, 22-p. Bayer, 38. (20000)
Union: Rönnov, Yuranoviç, Duxi, Bonuççi (Kaufmann, 80), Leyte, Qosens (Russiyon, 80), Haberer, Tuzar (Layduni, 75), B.Aaronson (Fofana, 46), Bekker (Hollerbax, 69), Berens.

Bayer-04 – Haydenhaym 4:1
Bonifas, 9; 74-p. Hofmann, 63. Adli, 82 – Ərən Dinkçi, 58. (29557)
Bayer-04: Qradetski, Frimponq (Tella, 79), Kossunu, Ta, Tapsoba, Qrimaldo (İnkapye, 85), Caka, Palasios (Andrix, 71), Hofmann, Virts (Adli, 71), Bonifas (Hlojek, 85).

Ayntraxt F – Frayburq 0:0
(55800)
Ayntraxt: Trapp, Buta (Knauff, 65), Tuta, Kox, Paço, Nkunku (Maks, 80), Skiri, Larsson, Dina Ebimbe (Götse, 57), Çaibi (Ferri, 80), Marmuş (Nqankam, 65).
Frayburq: Atubolu, Şallai, Ginter, Linhart, Sildilliya, Kübler (Şmidt, 84), Keytel, Eqqeştayn, Doan (Filipp, 74), Qrifo (Vaysshaupt, 74), Höler (Adamu, 84).

Ştutqart – Darmştadt 3:1
Girassi, 32; 90+2. Miyo, 22 – Zaqadu, 17-öz qapısına. (54000)

Verder – Köln 2:1
Borre, 38. Njinma, 67 – Zelke, 31. (42100)

Auqsburq – Maynts-05 2:1
Demiroviç, 15; 45 – Ajork, 6. (27310)

1. Bavariya 5 4 1 0 18-4 13
2. Bayer-04 5 4 1 0 17-6 13
3. Ştutqart 5 4 0 1 17-7 12
4. Leyptsiq 5 4 0 1 14-4 12
5. Hoffenhaym 5 4 0 1 12-6 12
6. Borussiya D 5 3 2 0 9-5 11
7. Volfsburq 5 3 0 2 7-6 9
8. Ayntraxt F 5 1 4 0 4-3 7
9. Frayburq 5 2 1 2 5-10 7
10. Union 5 2 0 3 9-9 6
11. Verder 5 2 0 3 8-10 6
12. Auqsburq 5 1 2 2 9-13 5
13. Haydenhaym 5 1 1 3 9-13 4
14. Bohum 5 0 3 2 4-16 3
15. Borussiya M 5 0 2 3 8-13 2
16. Köln 5 0 1 4 4-9 1
17. Darmştadt 5 0 1 4 6-16 1
18. Maynts-05 5 0 1 4 4-14 1
Bombardirlər: Girassi (Ştutqart) – 10, Keyn (Bavariya) - 7, Bonifas (Bayer-04) – 6.

Növbəti turun oyunları sentyabrın 29-u - oktyabrın 1-i aralığında keçiriləcək: Hoffenhaym - Borussiya D, Leyptsiq – Bavariya, Bohum – Borussiya M, Haydenhaym – Union, Frayburq – Auqsburq, Volfsburq – Ayntraxt F, Maynts-05 – Bayer-04, Köln – Ştutqart, Darmştadt – Verder.

Turun rəqəmi
10 – bundesliqada ötən mövsüm bombardir olmaq üçün 16 qol vurmaq kifayət etmişdi. Bu mövsüm isə cəmi 5 turdan sonra hesabında 10 qol olan futbolçu var! Söhbət “Ştutqart”lı Girassidən gedir. “Torba-torba” qollar vuran 27 yaşlı forvard bunun sayəsində hər tur bir rekordla yadda qalır. Bundesliqa tarixində daha öncə 5 tura 10 qolu yalnız bir futbolçu – 2020/21-də “Bavariya”nın heyətində Levandovski vurmuşdu. Girassi, ümumiyyətlə, bu mövsüm “böyük beşlik”də 10 qol həddinə çatan ilk futbolçudu.

Turun ulduzu
Harri Keyn (Bavariya) – İngiltərə yığmasının kapitanının bundesliqaya uyğunlaşması gözləniləndən də yaxşı keçir. Keyn “Bavariya”nın “Bohum”un qapısına göndərdiyi 7 qoldan 5-də iştirak edərək 90 dəqiqəni 3 qol, 2 məhsuldar ötürmə ilə tamamladı. 30 yaşlı ulduz turnirin tarixində Kevin Kiqan (1970), Toni Vudkok (1980, 1982) və Ceydon Sançodan (2020) sonra het-trik edən 4-cü ingiltərəli futbolçu oldu. Onu da bildirək ki, Keyn 5 oyunda artıq 10 qolun vurulmasında (7 qol, 3 məhsuldar ötürmə) yaxından iştirak edib və bu da bundesliqanın yeni rekordudu. Eyni zamanda “Bavariya” tarixində də buna qədər ilk 5 budnesliqa matçında 7 qol vuran futbolçu olmamışdı!

Turun sitatı
Tomas Tuxel, “Bavariya”nın baş məşqçisi: “Bohum son dönəmlərdə bizə problem yaratmağı bacaran komandalardandı. Hava toplarında və rəqibdən dönən toplarda mümkün qədər uğurlu oynamağa çalışdıq. Bu plan özünü doğrultdu. Ümumiyyətlə, yaxşı forma yığmışıq. Topa mükəmməl nəzarət etdik və fürsətlərdən əla yararlandıq. Komandamın motivasiyasından və oyuna yanaşma tərzindən razı qaldım. Bu oyun irəliyə doğru atılmış önəmli bir addım oldu”.