“Futbolçular Səudiyyə Ərəbistanına pul qazanmaq üçün gedirlər”
Tanınmış belçikalı yarımmüdafiəçi Aksel Vitsel həmyerlisi Yannik Ferreyra Karraskonun bu yay “Atletiko”dan Səudiyyə Ərəbistanı təmsilçisi “Əl-Şabab”a transferini şərh edərkən maraqlı etirafla diqqəti çəkib.
O, futbolçuların Səudiyyə Ərəbistanına yalnız pul qazanmaq üçün getdiklərini bildirib. Vitsel özü 2017-ci ildə “Zenit”dən Çin təmsilçisi “Tsyantsin Tsyuantsyan”a yollanmış və cəmi 36 oyun keçirəndən sonra Avropaya qayıtmışdı. Həmin illərdə Çin eynilə indiki dövrdə Səudiyyə Ərəbistanında olduğu kimi, adlı-sanlı futbolçuları böyük pullar qarşılığında öz çempionatına cəlb edirdi. Vitsel Avropaya qayıtdıqdan və 4 il Dortmund “Borussiya”sının şərəfini qoruduqdan sonra ötən ildən bəri “Atletiko”nun uğurları üçün tər tökür. 34 yaşlı futbolçu bunları deyib:
“Bu yaxınlarda telefonla Karrasko ilə söhbət etdim. O, Lemarın zədəsi barədə məlumat almaq üçün zəng vurmuşdu. Səudiyyə Ərəbistanındakı həyatı haqda danışdıq. Çox xoşbəxt olduğunu dedi. Hər futbolçu öz yolunu seçir. Səudiyyə Ərəbistanına yollanan futbolçuların düzgün addım atmadığını qətiyyən söyləmək istəmirəm. Çünki mən özüm də 27 yaşımda Çinə yollandım. Karraskonun addımını və seçimini dəstəkləyirəm. Çində böyük təcrübə qazandım. Bu təcrübəni həyatımın sonuna qədər heç kim məndən ala bilməyəcək. Amma açıq danışsaq, təbii ki, futbolçular belə ölkələrə yalnız pul qazanmaq üçün yollanır! Bəziləri yalandan və özünü təmizə çıxarmaq üçün onlara təklif olunan layihənin önəmindən danışırlar. Reallıq isə mən dediyim kimidi və Karrasko da ora pul qazanmaq üçün yollanıb. Mən buna normal yanaşıram”.
Qeyd edək ki, 30 yaşlı Karrasko özü də “Əl-Şabab”a keçəndən bir neçə gün sonra ailəsini və gələcəyini düşündüyü üçün Səudiyyə Ərəbistanına yollandığını etiraf etmişdi.
Digər xəbərlər
