Əl-Xelayfi Messinin cavabını verdi
Lionel Messi sabiq klubundan gileylənib. “İnter Mayami”nin hücumçusu PSJ-nin onu dünya çempionatında qələbə münasibətilə təbrik etmədiyini dilə gətirib.
Messi ötən ilin dekabrında Argentina yığması ilə çempionluq sevinci yaşamışdı. Onun çıxış etdiyi komanda finalda Fransanı penalti seriyasında üstələməklə çempion olmuşdu. Təcrübəli futbolçu milli komandanın klubundan bu münasibətlə təbrik almayan yeganə oyunçusu olduğunu deyib. PSJ-nin prezidenti Nasser Əl-Xelayfinin onun bu fikrinə reaksiyası belə olub:
“Hamı bizim Messi üçün məşq bazamızda xüsusi tədbir keçirməklə təbrik etdiyimizi görüb: həmin səhnənin videosunu internetdə yerləşdirmişdik. Biz onu şəxsən təbrik etmişik. Hörmət amilinə gəlincə, biz Fransa klubuyuq. Əlbəttə, təbrik tədbiri stadionumuzda təşkil edilsəydi daha yaxşı olardı. Amma onun finalda qalib gəldiyi komandanın təmsil etdiyi ölkəyə, Fransa yığmasının oyunçularına və azarkeşlərinə hörmət etməliyik”.
Xatırladaq ki, Messi rəhbərliyin yeni təklifini qəbul etməmiş və ötən mövsümün sonunda PSJ-dən azad agent kimi ayrılmışdı.
Digər xəbərlər
