Ukraynalı Aleksandr Usik Vrotslavda keçirilən boks gecəsində britaniyalı Daniel Dyubuaya qalib gəlib.
“Football-plus.az” xəbər verir ki, rəqibini 9-cu raundda nokauta salan ukraynalı superağır çəkidə IBF, WBA, WBO və The Ring versiyası üzrə dünya çempionu titulunu özündə saxlayıb. Bu, 36 yaşlı Usik üçün 2022-nin avqustundan bəri keçirdiyi ilk döyüşdü. Dyubua döyüşsonrası mətbuat konfransına qatılmayıb.

Usik isə belə deyib: “Dyubuanın məğlub olarsa, karyerasın bitirəcəyini oxumuşdum. Ona dedim ki, bu yaxşı yol deyil, sən hələ gənsən. Bəlkə də emosiyaların təsiri altında belə deyib”.

Ukraynalı WBC versiyası üzrə dünya çempionu Tayson Füri ilə nə vaxt döyüşəcəyi haqda suala da cavab verib: “Günü sabah hazıram. Ancaq o hazırdımı? Bilmirəm”.

Dyubua mətbuat konfransına qatılmasa da, sonradan döyüşün nəticəsindən narazılığını gizlətməyib: “Usikə hörmət edirəm. Əsl çempiondu, ondan nələrisə öyrənməliyəm. Ancaq ötən gecə hakimlər mənim əlimi yuxarı qaldırmalıydı”.

Dyubuanı narazı salan hadisə 5-ci raundda yaşanıb. Onun zərbəsindən sonra ukraynalı kanvasın üzərinə yıxılıb. Ancaq referi həmin zərbəni yasaq (qurşaqdan aşağı) zərbə sayıb.

Xatırladaq ki, bu döyüş avqustun 26-da Polşanın Vrotslav şəhərində keçirilib.

Bu arada Usikin meneceri Egis Klimas deyib ki, Tayson Füri ilə birləşdirici döyüşü təşkil etmək mümkün olmasa, ukraynalı xorvatiyalı Filip Hrqoviçlə qarşılaşacaq.

Fürinin maraqlarını təmsil edən “Queensberry Promotions”un rəhbəri Frenk Uorrenin fikrincə, Usiklə döyüş 2024-cü ilin əvvəlində keçirilə bilər. Onun dediyinə görə, bu yöndə danışıqlar hələ də davam edir.