D qrupu
Real Sosyedad – İnter 1:1 (1:0)
Real Sosyedad (San Sebastyan, İspaniya): Remiro, A.Traore, Subeldiya, Le Norman, Tirni (Munyos, 62), Mendes (Paçeko, 85), Merino, Subimendi, Kubo (Odriosola, 72), Barreneçea (Şo, 62), Oyarsabal (Sadik, 72).
İnter (Milan, İtaliya): Zommer, Bastoni (Dimarko, 55), De Vrey (Açerbi, 76), Pavar, Dyumfris, Barella, Auqusto, Asllani (Frattezi, 55), Mxitaryan (Sançes, 70), Lautaro Martines, Arnautoviç (Türam, 55).
Qollar: Mendes, 4 (1:0). Lautaro Martines, 87 (1:1).
Vərəqələr: Asllani, 13. Mxitaryan, 60. Frattezi, 70. A.Traore, 89. Subeldiya, 90+5 - sarı.
Hakim: Maykl Oliver (İngiltərə).
20 sentyabr. San Sebastyan. 36591 tamaşaçı.

oyunun statistikası
13 (5) qapıya (“çərçivə”yə) zərbə 5 (1)
7 künc zərbəsi 4
1 ofsayd 4
14 qayda pozuntusu 15
2 (0) sarı (qırmızı) vərəqə 3 (0)
45 topa sahibolma (faizlə) 55

İmanol Alquasil “İnter” ilə ev oyunu ərəfəsində keçirilən mətbuat konfransında “biz ötən mövsüm bu turnirdə qələbənin biraddımlğında olan rəqibə qarşı oynayacağıq. Rəqibə hörmətimizi ifadə edirik, amma bura Çempionlar Liqasıdı. Meydanda var gücümüzü qoymağa və qalib gəlməyə çalışacağıq” demişdi. Onun çalışdırdığı komanda son finalçıya qarşı çox yaxşı oynadı, uzun müddət hesabda öndə oldu, amma “Real Sosyedad” sonda yalnız bir xal qazandı.

“Reale arena”da keçirilən oyunu iki çox əsəbi hissəyə bölmək olar. İlk hissədə ev sahibləri oyun planında aşkar üstün göründülər. Mendesin artıq 4-cü dəqiqədə hesabı açması matçın əvvəlindəki mənzərənin məntiqi nəticəsi idi. Erkən qolla kifayətlənməyən Alquasilin komandası hücumları davam etdirməklə növbəti qolu vurmaq niyyətini açıq büruzə verirdi. Belə desək, başını qaldıra bilməyən “İnter” rəqibin həmlələrinə heç bir cavab verə bilmirdi. Simone İnzaqinin komandası matçın böyük hissəsində yalnız rəqibin hücumlarının qarşısını almaqla məşğul oldu. “Real Sosyedad” hesabı bir neçə dəfə dəyişmək şansı qazandı. Lakin baskoniyalılar imkanları dəyərləndirə bilmədilər.

Qonaqlar yalnız bir neçə yeni oyunçunun mübarizəyə qoşulmasından sonra özlərinə gələ bildilər. Matçın böyük hissəsini intensiv keçirən meydan sahibləri ikinci hissənin ortalarından başlayaraq yoruldular. Artıq müdafiəyə çəkilməli olan Alquasilin komandası milanlıların təzyiqinə tab gətirə bilmədi. Lautaro Martinesin 87-ci dəqiqədə vurduğu cavab qolu matçın heç-heçə nəticələnməsini təmin etdi. Əlbəttə, “Real Sosyedad”ın çox üstün oynaması fonunda qələbə qazana bilməməsi yerli və neytral azarkeşlərdə təəssüf doğura bilər. Amma Çempionlar Liqasında təcrübə amili əksər hallarda nəticəyə təsir edir.

Benfika - Zaltsburq 0:2 (0:1)
Benfika (Lissabon, Portuqaliya): Trubin, Bax, A.Silva, Otamendi, Eursnes, Neveş, Kökçü (Şikinyo, 72), Di Mariya (Neres, 72), R.Silva (Quveyya, 84), Joao Mario (Morato, 16), P.Musa (Tenqstedt, 84).
Zaltsburq (Avstriya): Şlaqer, Dediç, Bedu (Sole, 71), Pavloviç (Pentkoviç, 89), Terziç, Bidstrup, Qurna-Duat, Kyerqor, Qlux (Suçiç, 71), Şimiç (Ratkov, 71), Konate (Koyta, 59).
Qollar: Şimiç, 15-p. (0:1). Qlux, 51 (0:2).
Konate 3-cü dəqiqədə penaltidən yararlana bilməyib (üst).
Vərəqələr: Trubin, 2. Qurna-Duat, 21. R.Silva, 54. Bedu, 58. Şimiç, 67. Otamendi, 69. Koyta, 90+1 - sarı. A.Silva, 13 – qırmızı.
Hakim: Halil Meler (Türkiyə).
20 sentyabr. Lissabon. 60917 tamaşaçı.

oyunun statistikası
17 (7) qapıya (“çərçivə”yə) zərbə 13 (4)
4 künc zərbəsi 5
2 ofsayd 3
9 qayda pozuntusu 19
3 (1) sarı (qırmızı) vərəqə 4 (0)
56 topa sahibolma (faizlə) 44

Çempionlar Liqasının ən gənc heyətə malik olan komandası turnirin son mövsümünün 1/4 finalçısını səfərdə məğlub etdi. “Zaltsburq”un Lissabonda qalib gəlməsi ilk turun sürpriz nəticəsi oldu. Gerhard Ştruberin çalışdırdığı komanda artıq 3-cü dəqiqədə hesabı açmaq üçün əla şans qazansa da, Konate bundan yararlana bilmədi. Buna baxmayaraq, hücumları davam etdirən Avstriyanın dəyişməz çempionu bir neçə dəqiqədən sonra istəyinə çatdı. Antonio Silva cərimə meydançasında əllə oynamaqla “Benfika”ya ikiqat zərbə vurdu: hakim ona birbaşa qırmızı vərəqə, Şimiç isə penaltini necə qola çevirmək lazım gəldiyini Konateyə göstərdi.

Hesabı açan Roko fasilədən az sonra Qluxa ikinci qolu vurmaq üçün gözəl fürsət qazandırdı. Lissabonlular on nəfərlə oynamasına baxmayaraq, cəsarətli həmlələrə əl atırdılar. Di Mariya, Musa və Rafael Silva fəallığıyla xüsusi seçilsə də, hesabı dəyişməyə nail ola bilmədilər. Beləklə, “Benfika”nı səfərdə məğlub edən “Zaltsburq” D qrupunda ilk turdan liderliyi ələ aldı.

3 oktyabr: İnter – Benfika, Zaltsburq – Real Sosyedad.
Bombardirlər: Alvares (Mançester Siti), Qaleno (Portu), Kazemiro (Mançester Yunayted), Feliş (Barselona) – 2.

Oyundan sonra
Simone İnzaqi, “İnter”in baş məşqçisi: “Bu gün çox güclü rəqibə qarşı oynadıq. İşimizin çətin olacağını gözləyirdik. Qapıçımızın sayəsində oyunda sona qədər xilas olmaq şansımızı saxladıq. Heç də ən yaxşı oyunumuzu göstərmədiyimizi etiraf etməliyəm. Yalnız son 20 dəqiqədəki çıxışımızdan razı qaldım. Hesabı bərabərləşdirəndən sonra qələbə qolunu da vurmağa çalışmağımız məni sevindirdi”.

Martin Subimendi, “Real Sosyedad”ın yarımmüdafiəçisi: “Məyusuq, çünki son dəqiqələrdə iki xal itirdik. Matçda qədər “İnter”lə heç-heçə bizim üçün yaxşı səslənirdi, lakin oyundan sonra qələbəyə layiq olduğumuzu deyə bilərik. Çempionlar Liqası hamımızın oynamağa can atdığı turnirdi. Bunu mənim doğma şəhərimdə etmək, “Real Sosyedad”ın formasında bu azarkeşlərin dəstəyi altında meydana çıxmaq ən gözəl hisslərdi”.

Brais Mendes, “Real Sosyedad”ın yarımmüdafiəçisi: “Matçı yüksək səviyyədə keçirdik. Gərək məsələni daha əvvəl öz xeyrimizə həll edəydik. Bunun üçün kifayət qədər şansımız oldu, amma imkanları boşa verdik. Meydanı eyni zamanda qürur və məyusluq hissləri ilə tərk etdik”.

Yan Zommer, “İnter”in qapıçısı: “Çətin oyun idi. İlk hissəni zəf keçirdik, rəqib bizi güclü təzyiq altında saxladı. Nəticədə bir neçə dəfə səhvə yol verdik və “Real Sosyedad” epizodların birində hesabı açdı. Çox çətin vəziyyətə düşmüşdük. Sonda bir xal qazandığımız üçün sevinməliyik”.