Benfika – İnter 0:2 (0:0)

Benfika (Lissabon, Portuqaliya): Vlahodimos, Jilberto, A.Silva, Morato, Qrimaldo, Çikinyo, Luiş (Neres, 64), Mario, R.Silva, Eursnes, Ramoş.
İnter (Milan, İtaliya): Onana, Dyumfris (D`Ambrosio, 86), Darmian, Açerbi, Bastoni (De Vrey, 90), Dimarko (Qosens, 63), Mxitaryan, Brozoviç, Barella, Martines (Korrea, 63), Ceko (Lukaku, 63).

Qollar: Barella, 51 (0:1). Lukaku, 82-p. (0:2).
Vərəqələr: A.Silva, 22. Brozoviç, 50. Ceko, 83 – sarı.
Hakim: Maykl Oliver (İngiltərə).
11 aprel. Lissabon. 62594 tamaşaçı.

“İnter” daha adlı-sanlı komanda sayılmasına və heyətinə görə üstün görünməsinə baxmayaraq, konkret bu qarşılaşmada favorit hesab olunmurdu. Çünki Simone İnzaqinin komandası son vaxtlar qeyri-sabit təsir bağışlayaraq qalib gəlməkdə çətinlik çəkirdi. “Benfika” isə Rocer Şmidtin başçılığı altında çox güclü mövsüm keçirirdi. Lissabon nəhəngi PSJ və “Yuventus”un yer aldığı qrupu lider kimi tamamlamışdı. Üstəlik “Benfika” bu oyuna qədər 23 qolla “Napoli”dən (25) sonra bu mövsüm ÇL-də ən məhsuldar komanda idi. Amma bu dəfə meydan sahiblərinə nə bu faktlar kömək etdi, nə də güclü azarkeş dəstəyi.

İlk hissə o qədər də baxımlı alınmadı. Temp aşağı idi və qapılar önündə nadir hallarda təhlükə yaranırdı. Belə oyun, təbii ki, qonaqlara daha çox sərf edirdi. “Benfika” evdə oynadığından məhz portuqaliyalılar tempi artırmalı və fəallıq göstərməli idilər. Lissabon nəhənginin bu passivliyi fasilədən sonra da davam edincə, qonaqlar işi cavab oyununa saxlamamaq qərarına gəldilər. İkinci hissənin əvvəllərində Vlahodimos topu tordan çıxarmalı oldu. Müdafiəçilər Ceko ilə Martinesi bağlamağa çalışdığı vaxtda səhnəyə Barella çıxdı. 175 sm boya malik yarımmüdafiəçi Bastoninin sol cinahdan asması zamanı başla topu tora göndərdi. Təbii ki, bu, Barellanın “İnter”in heyətində başla vurduğu ilk qol oldu! Beləcə milanlıların “çərçivə”yə ilk zərbəsi qolla nəticələndi. Hesab açılandan sonra oyunun ssenarisi çox da dəyişmədi. “Benfika”nın cılız hücumları “İnter” müdafiəçiləri üçün problem yaratmırdı.

Oyunun axarı onu göstərirdi ki, “Benfika”nın bərabərlik qolundan çox “İnter” ikinci qolu vurmağa yaxındı. Mxitaryan və Dyumfris gözəl fürsətləri əldən verdikdən sonra “neradzurra” 80-ci dəqiqədə penalti qazandı. İngiltərəli Maykl Oliver VAR-ın məsləhətindən sonra Marionun əllə oyununa görə penalti təyin etdi. Lukaku soyuqqanlı şəkildə topu tora göndərməklə həm yekun nəticəni müəyyənləşdirdi, həm də faktiki olaraq bu dueldə intriqanı öldürdü. Düzdü, “Benfika” bu mövsüm artıq “Yuventus” kimi İtaliyanın digər nəhəngini səfərdə yenməyi bacarıb. Amma etiraf edək ki, bu nəticədən sonra “Qartallar”ın şansları çox azaldı. Bir möcüzə baş verməsə, bu mövsüm 2017-dən bu yana ilk dəfə finalda İtaliya klubu yer alacaq!

Oyunun statistikası
12 (2) qapıya (“çərçivə”yə) zərbə 9 (4)
4 künc zərbəsi 6
1 ofsayd 1
11 qayda pozuntusu 9
1(0) sarı (qırmızı) vərəqə 2(0)
57 topa sahibolma (faizlə) 43

Faktlar
* “Benfika”nın ÇL-də 1/4 final lənəti davam edir. Komanda bu mərhələdə ardıcıl 11-ci oyunda qələbəyə həsrət qaldı (4 heç-heçə, 7 məğlubiyyət).
* “Benfika” bu mövsüm ÇL-də ilk dəfə uduzdu. Bundan başqa komandanın avrokuboklarda 18 oyunluq qol vurmaq seriyası qırıldı.
* “İnter” avrokuboklarda Portuqaliyada keçirdiyi 11-ci oyunda cəmi 2-ci qələbəsini qazandı (5 heç-heçə, 4 məğlubiyyət). Bu oyuna qədər komanda Portuqaliyada keçirdiyi son 6 qarşılaşmanın 5-də qola həsrət qalmışdı.
* “İnter” ÇL-də keçirdiyi son 8-ci oyunda 6-cı dəfə qapısını toxunulmaz saxladı.