Felişin açıqlaması “Atletiko”da gərginliyə səbəb oldu
Joao Felişin “Atletiko”ya qayıtmaq istəməməsi haqda hələ bir neçə ay əvvəl yayılan xəbər doğru imiş. O, “Barselona”da oynamağı arzuladığını dilə gətirib.
"Football-plus.az" xəbər verir ki, tanınmış jurnalist Fabritsio Romano “tvitter” səhifəsi vasitəsilə portuqaliyalı oyunçunun sözlərini belə çatdırıb:
“Mən “Barselona”da oynamaq istərdim. “Barselona” həmişə ilk seçimim olub və bu kluba keçməyi arzulamışam. Bu, mənim uşaqlıq arzum olub. Transfer reallaşsa, bu, mənim üçün gerçəkləşən bir yuxu olacaq”.
Qeyd edək ki, Feliş ötən mövsümün ikinci yarısını icarə əsasında “Çelsi”də keçirib. Onun açıqlaması “Atletiko”nun bosslarını bərk qəzəbləndirib. Madrid klubunun rəhbərliyi portuqaliyalı oyunçunun fikirləri ilə tanış olandan sonra onun agenti Jorje Mendeşdən də inciyib. “Atletiko”nun futbolçunun açıqlaması ilə bağlı bəyanatında belə deyilir:
“Oyunçunun agenti Joaonun klubu tərk etməsi üçün hansı şərtlərə əməl edilməli olduğunu yaxşı bilir. Bundan sonra bununla bağlı şərh verəcək heç bir sözümüz yoxdu”.
Xatırladaq ki, 23 yaşlı Feliş “Atletiko”ya müqavilə ilə 2027-ci ilin yayına qədər bağlıdı.
Digər xəbərlər
