“Qarabağ” avrokuboklarda növbəti payız macərasına başlayıb.

"Football-plus.az" xəbər verir ki, “köhlən atlar” bu gün Avropa Liqasının qrup mərhələsinin ilk oyununda “Molde”ni qonaq edib. Qarşılaşma “CBC Sport” kanalında canlı yayınlanıb.

Avropa Liqası
qrup mərhələsi
H qrupu
Qarabağ – Molde (Norveç) 1:0
Leandro Andrade, 56
Qarabağ": 99. Andrey Lunyev, 2.Mateus Silva, 5. Maksim Medvedev, 81. Kevin Medina, 44. Elvin Cəfərquliyev, 6. Julio Romao, 8. Marko Yankoviç, 7. Yassin Benzia, 15. Leandro Andrade, 10. Abdullah Zubir, 19.Juninyo.
Ehtiyat oyunçular: 23. Luka Quqeşaşvili, 55.Bədavi Hüseynov, 89.Amin Ramazanov, 4. Rahil Məmmədov, 27. Toral Bayramov, 13. Bəhlul Mustafazadə, 30.Abbas Hüseynov, 17. Hamidu Keyta, 20. Riçard Almeyda, 66. Patrik Andrade, 90.Nəriman Axundzadə.
"Molde": 1. Yakob Karlstrom, 25. Andres Hagelskyaer, 2. Martin Byornbak, 3. Kasper Oyvann, 28. Kristoffer Hogen, 15. Markus Kaasa, 6. Martin Ellinqsen, 16. Emil Breyvik, 31. Matias Lovik, 9. Veton Berişa, 7. Maqnus VolffEikrem (k).
Ehtiyat oyunçular: Petersen, Lervik, Kappis, Hestad, Qulbradsen, Kitolano, Hauqan, Eriksen, Linnes, Qrödem, Odeqard.
Hakimlər: CON BİTON, Daniel Makferleyn, Duqlas Potter, Mettyu Makdermid (hamısı Şotlandiya).
VAR hakimi: Niçolas Ualş (Şotlandiya)
VAR hakiminin köməkçisi: Steven Maklin (Şotlandiya).
Hakim-inspektor: Şmuel Şteif (İsrail).
UEFA nümayəndəsi: Andi Zere (Albaniya).
21 sentyabr. Bakı. Tofiq Bəhramov adına Respublika stadionu. Saat 20.45.

“Köhlən atlar” üçün “Molde” tanış rəqibdi. Norveç təmsilçisi ilə “Qarabağ” Çempionlar Liqasının 2020/21 mövsümünün 3-cü təsnifat mərhələsində üz-üzə gəlmişdi. Cənubi Kiprin Larnaka şəhərində keçirilən qarşılaşmanın əsas vaxtında hesab açılmamışdı. Əlavə hissələrə də qapılara qol vurulmadığından matçın taleyi penalti seriyasında həll olunmuşdu. Burda daha dəqiq olan norveçlilər pley-offa vəsiqə qazanmışdı. Həmin görüşdən öncə “Molde”nin hansı yollara əl ataraq matçın neytral meydanda keçirilməsinə nail olduğunu hamıya bəllidi. İndi “Qarabağ” üçün intiqam zamanıdı. “Köhlən atlar” Bakıdakı oyunda Erlinq Moenin komandasına qalib gəlmək istəyir. Bu, o qədər də asan olmayacaq. “Molde” yaxşı təşkilatlanmış kollektivdi. Komanda cinahlarda olduqca fəaldı. Ağdamlılar rəqibin cərimə meydanına asmalarından ehtiyatlanmalıdı. Çempionlar Liqasının pley-off mərhələsində “Qalatasaray”a asan təslim olmayan norveçlilər “Qarabağ”a da çətin anlar yaşada bilər.

Lakin rəqibdən qorxmağa da ehtiyac yoxdu. Qurban Qurbanovun və “köhlən atlar”ın təcrübəsi “Molde”ni məğlub etmək dərəcəsindədi. Ağdam təmsilçisi ənənəvi oyun sistemindən istifadə edərək mərkəzdə topa daha çox nəzarət etsə, rəqibin müdafiəsinə çətin anlar yaşada biləcək.

İndi üçün ən vacib məqam Qurban Qurbanovun hansı heyəti güvənəcəyidi. Bir çoxları düşünür ki, təcrübəli mütəxəssis Misli premyer-liqasının 6-cı turunda “Sabah”ı məğlub edən futbolçuları meydana buraxacaq. Lakin avrokuboklar üçün “köhlən atlar”ın standart “11-liy”i olur. Bütün bunları nəzərə alaraq, “Qarabağ”ın “Molde”yə qarşı təxmini heyətini diqqətinizə çatdırırıq: Luka Quqeşaşvili, Elvin Cəfərquliyev, Kevin Medina, Bəhlul Mustafazadə, Mateus Silva, Julio Romao, Marko Yankoviç, Abdulla Zubir, Yassin Benzya, Leandro Andrade və Juninyo.

Amin Ramazanovun avrokuboklarda o qədər də təcrübəsi yoxdu. “Sabah”la matçda Qurbanov onu limitə görə meydana buraxmışdı. Avropa Liqası matçında isə buna ehtiyac yoxdu.

Bir sözlə, bu gün “Qarabağ”ı tarixi əhəmiyyətli oyun gözləyir. Yuxarıda qeyd etdiyimiz kimi, Ağdam təmsilçisi “Molde”dən qisas almalıdı. Nəzərinizə çatdıraq ki, 2023/24-cü “futbol ili” turnirin bu formatda keçiriləcək sonuncu mövsümüdü. Son Azərbaycan çempionu bunu nəzərə alaraq yarışda bacardığı qədər irəli getməyə çalışacaq. Bunun üçünsə “Molde”ni Bakıda məğlub etmək və turnirə 3 xalla başlamaq lazımdı.

İLKİN SULTANLI