“Neftçi” “Araz Naxçıvan”a məğlub olan kimi sosial şəbəkələrə göz gəzdirdim.

Yeni rəhbərliyin və rumıniyalı baş məşqçi Adrian Mutunun gəlişindən sonra xeyli ümidlənən azarkeşlər hamısı məyus idi. Onların məyusluğu həm öz səhifələrində, həm də azarkeş qruplarında yazılan şərhlərdən, verilən suallardan hiss edilirdi. Xüsusən də cavabsız qalan suallardan. Sadəlövh azarkeşlər inanmışdı ki, SOCAR-ın rəhbərliyi komandanı nəzarətə götürəndən, Basketbol Federasiyasının baş katibi Fərrux Mahmudov kluba baş icraçı direktor göndəriləndən sonra işlər yağ kimi getməyə, qələbələr sıralanmağa başlayacaq. Azarkeşlər “Neftçi”nin dərhal “Qarabağ”la “Sabah” başda olmaqla premyer-liqadakı rəqibləri məğlub edəcəyinə, elə mövsümün əvvəlindəcə liderlik kürsüsünə əyləşəcəyinə inanmışdılar. Bu yolda avrokuboklardakı daha bir mövsüm qurban verilmiş, artıq ikinci turda alınan məğlubiyyətlər heç kimin vecinə olmamışdı.

Yeni rəhbərliyin ən böyük uğuru komandanın oynadığı stadionun adının dəyişdirilməsi, “arena” kəlməsinin qarşısına “Neftçi” sözünün yapışdırılması olub. Vəssalam. Qalan hər şey bərbaddı. Oyun yox, komandanın nə istədiyi bəlli deyil, Mutunun oyun sistemi, ümumiyyətlə, görünmür. Nəticələri isə bircə sözlə ifadə etmək olar: faciəvi! “Neftçi” Gəncədə “Kəpəz”ə uduzanda, doğma meydanda “Səbail”lə bata bilməyəndə rumıniyalı çalışdırıcının bəhanəsi var idi. Deyirdi ki, avrokuboklardan dolayı qrafik xeyli sıxdı, oyunlar arasındakı qısa zaman futbolçularına bərpası üçün yetərli deyil. O dedi, biz də inandıq. Unutduq ki, “Qarabağ” da eyni qrafikdə oynaya-oynaya Avropa Liqasının qrup mərhələsinə vəsiqə qazanıb. Sözüm onda deyil. Mutunun şikayətini haqlı saydıq, indi o şikayətləri doğuran səbəblər də aradan qalxıb.

“Transfer pəncərəsi” bağlanıb, amma “Neftçi”yə hələ də yeni əcnəbilər gəlir. Soruşan yoxdu ki, limitin tələblərini nəzərə alırsızmı, bu futbolçuları harda oynadacaqsız? “Neftçi” avrokuboklarda mübarizəyə davam etsəydi, Mutunu və “ağ-qaralar”ın rəhbərliyini başa düşərdim. Deyərdim ki, onlar Azərbaycanı avrokuboklarda daha yaxşı təmsil etmək üçün iki bərabərsəviyyəli heyət qururlar. Onsuz da avrokubok oyunlarında limit yoxdu, Mutu 11 əcnəbi futbolçunu meydana buraxıb, qrup mərhələsində qələbələri sıralayacaq. “Neftçi” üçün avrokubok mövsümü bitib. Yerli çempionatda limit var. “Neftçi” isə qapısını legioner futbolçular üçün açıq qoyub. Gələn gələnədi. O qədər sürətlə və həvəslə gətirirlər ki, gələnlərin Məşədi İbadın sözü olmasın, işə yaradığına baxan da yoxdu. Bir də baxırlar ki, gətirdikləri hücumçu Aaron Olanare kimi artıq çəkisi olandı, meydanda çətinliklə hərəkət edir. Ümumiyyətlə, “Neftçi”yə gətirilən əcnəbilərin yaşına baxın. Təvəllüdləri 1993, 94 və 95-ci illər olan futbolçular üstünlük təşkil edir. Bilmirəm adamlar “təqaüdçülər klubu” qurur, yoxsa gələcəyin komandasını...

Məyus “Neftçi” azarkeşləri oyundan dərhal sonra “feysbuk”da yazırdılar ki, Mutunun mətbuat konfransıda nə deyəcəyini səbrsizliklə gözləyirlər. Guya Mutu mətbuat konfransında məsuliyyəti öz üzərinə götürüb, məğlubiyyətə görə azarkeşlərdən üzrxahlıq edəcəkmiş. Amma şəxsən mən adım kimi əmin idim ki, baş məşqçi belə etməyəcək. Yenə gileylənəcək, vaxtdan, uyğunlaşmadan danışacaq, rəqibin müdafiədən oynamasından şikayət edəcək. Belə də oldu. Sanki premyer-liqaya bu il yüksələn, mövsümün startına 5-10 gün qalmış yığışan, normal hazırlıq keçməyən “Araz Naxçıvan” ölkənin ən zəngin və qocaman klubuna “açıq oyun” təklif edib, ona qarşı daim hücumda oynamalı imiş. Mutu elə düşünür ki, “Araz Naxçıvan”ın baş məşqçisi Azər Bağırovun futboldan xəbəri yoxdu. Gərək ona Azər bəy haqda danışaydılar, onun Azərbaycanın PRO kateqoriyası almış ən gənc məşqçisi olması haqda məlumat verəydilər.

Mutu bunları bilmədiyinə görə “Araz Naxçıvan”ın penaltidən başqa şansının olmadığını deyir, nominal meydan sahiblərinin 10 nəfərlə müdafiə olunduğunu dilə gətirir. Hələ üstəlik oyunda diqtə edən tərəf olmaları ilə də öyünəcək qədər üzsüzlük edir. Bir müddət keçəcək, Mutu komandadakı legionerlərdən də şikayətlənəcək, onun istədiyi futbolçuların gətirilmədiyini deyəcək, günahı Kamil Məmmədovun üzərinə atmağa çalışacaq. Görəcəyimiz günlər irəlidədi, ekrana yaxın əyləşin!

AMAL