Ceyhun Sultanov Kamran Quliyevin gedəcəyini gözləyirmiş
Ötən mövsüm premyer-liqada 3-cü yeri tutaraq Konfrans Liqasına vəsiqə qazanan "Neftçi"nin prezident postunda dəyişiklik baş verdi. 2018-ci ildən "ağ-qaralar"a rəhbərlik edən Kamran Quliyev vəzifəsindən azad edildi. Onu Basketbol Federasiyasının icraçı direktoru Fərrux Mahmudov əvəzlədi.
Kamran Quliyevin gedişi və Fərrux Mahmudovun gəlişi ilə bağlı daha əvvəl paytaxt təmsilçisində idman direktoru vəzifəsində çalışan Ceyhun Sultanovla əlaqə saxladıq.
Onun "Football-plus.az"a söylədikləri belə oldu:
"Son hadisələrdən sonra Kamran Quliyevin gedəcəyi məlum idi. Vəzifə elə şeydi ki, bu gün burdasan, sabah başqa yerdə. Onun vaxtında "Neftçi" uzun illərdən sonra ölkə çempionu oldu. Ona bundan sonrakı karyerasında uğurlar arzulayıram. Yeni prezident Fərrux Mahmudova gəlincə, onun iş prinsipini bilmirəm. İndidən nəsə demək çətindi. Hər şeyi zaman göstərəcək".
Sultanov "ağ-qaralar"a yeni təyin olunan baş məşqçi Adrian Mutu barədə də fikrini bizimlə bölüşdü:
"Adrian Mutu haqda da nəsə demək tezdi. Gənc mütəxəssisdi. İstərdim ki, uğurlu olsun. Zamanla onun da nəticələrini görəcəyik".
CAVİD ƏLİYEV
Digər xəbərlər
