Oyun maraqla gözlənilirdi. Gəncədə şagird-müəllim duelini izləmək çoxunun arzusu idi. Lakin “Səbail” ilk dəqiqələrdə intriqanı öldürdü. Şahin Diniyevin komandası 2-ci dəqiqədə Yusifin baş zərbəsi ilə hesabı açdı. Qoldan sonra “sarı-göylər” özlərinə gələ bilmədilər.

Deməzdik ki, gəncəlilər zəif təsir bağışlayırdılar. Şuaybu, Onanuqa, Mate və Papunaşvili özünü yaxşı tərəfdən göstərirdi. Lakin adını çəkdiklərimiz fərdi çıxışı ilə diqqəti çəkirdi, kollektiv oyun yox dərəcəsində idi. “Səbail” isə bundan istifadə edərək ikinci qolu vurdu. 16-cı dəqiqədə Almeydanın uzaqdan zərbəsi möhtəşəm alındı. Ümumiyyətlə, əvvəlcədən deyə bilərik ki, “Kəpəz”in məğlubiyyətinin əsas səbəbkarlarından biri və bəlkə də birincisi qolkiperdi. Vasilyuçek ilk iki qolun hər birində kobud səhvə yol verdi. İlk hissənin qalan dəqiqələrində “Səbail” bir qədər sakitləşdi. Şahin Diniyevin komandası sanki yorulmaq istəmirdi.

Fasilədən sonra da bakılılar daha üstün oyun sərgiləyirdi. Nuno, Almeyda, Qomis, Ağabala rəqib müdafiəçilərə başağrı idi. Açıq-aşkar hiss olunurdu ki, Şahin Diniyev normal komanda formalaşdırıb. Gəncə təmsilçisi bu rəqiblə bacarmaq potensialında deyildi. Üçüncü qol dediklərimizin bariz isbatı idi. Meydanın mərkəzindən Nunonun ideal ötürməsini qəbul edən Ramalinqom möhtəşəm zərbə ilə hesabı 3:0 etdi. Əslində “Səbail” daha çox qol vura bilərdi. Sadəcə, Diniyev 70-ci dəqiqədən sonra meydana yerli futbolçuları buraxdı. Onlar da gəncəlilərə çətin anlar yaşatsa da, qarşılaşmada başqa qol vurulmadı. Beləliklə, oyun 3:0 hesabı ilə bakılıların xeyrinə başa çatdı. Onlar ardıcıl 3-cü görüşdə qələbə qazanmaqla iddiasını ortaya qoydu.

Gözdən qaçmadı
* Qarşılaşmanı izləyənlər arasında AFFA-nın baş katibi Sərxan Hacıyev, İcraiyyə Komitəsinin üzvü İsgəndər Cavadov və FİF-in icraçı direktoru Tural Piriyev də var idi.
* Yusif Nəbiyev “Səbail”in hesabı açdığı epizodda qol vurarkən sevinmədi.
* Almeyda 2-ci qolu vuran kimi “Kəpəz” azarkeşləri baş məşqçini istefaya səslədi. Gəncəlilərin təhlükəsizlik xidmətinin rəhbəri onları sakitləşdirmək istəsə də, alınmadı: “Ə nə olub? 5-ci turda baş məşqçini istefaya səsləyərlər?”
* Komandalar fasilədən dönən zaman Azər Məmmədov çox qəmli görünürdü. Sanki o, məğlubiyyətlə barışmışdı.
* İkinci hissə başlamamışdan “Kəpəz” futbolçulrı ayrı-ayrılıqda meydana çıxsalar da, “Səbail”in üzvləri Ağabala Ramazanovun ətrafına yığıldıqdan sonra meydana addım atdılar.
* 2-ci hissənin ortalarında gəncəli azarkeşlər “Azər, komanda niyə oynamır” şüarını səsləndirdilər.
* 65-ci dəqiqədə Elmir Tağıyev zədələnən zaman azarkeşlər Şahin Diniyevə ağız açdı: “Ay Şahin, bizi biabır etmə! Bura Gəncədi ee! Daha bəsdi! Denən çox qol vurmasınlar!”. Diniyev onlara “baş üstə” deyərək qarşılarında əyildi.
* Elmir Tağıyev meydandan çıxan zaman Diniyev ona tərəf gedərək təsəlli verdi.
* Oyun bitən kimi azarkeşlər yenə Azər Məmmədovu istefaya səslədilər.

İLKİN SULTANLI