Oyundan öncə çoxu “Qarabağ”ın rahat qələbə qazanacağını düşünürdü. Çünki “ağdamlıların ikinci heyəti belə “Kəpəz”dən daha yaxşıdı” düşüncəsi var idi. Əslində hər şey ona doğru gedirdi.

"Football-plus.az" xəbər verir ki, “köhlən atlar” qarşılaşmaya çox yaxşı başladı. Juninyo artıq 9-cu dəqiqədə fərdi reyddən sonra hesabı açdı. Bu epizodda braziliyalının fərdi keyfiyyətlərinin nə qədər güclü olduğu, gəncəlilərin müdafiə xəttinin zəifliyi açıq-aşkar hiss olundu.

Qoldan sonra düşünmək olardı ki, “köhlən atlar” davamını gətirərək böyükhesablı qələbə qazanacaq. Amma “Kəpəz” futbolçuları bu düşüncədə deyildi. Gəncəlilər ağdamlıların müdafiə xəttindəki boşluqlardan istifadə etməyə başladı. Daha çox basqı quran “sarı-göylər” ardıcıl hücumlarla yeni transfer Lunyovu narahat edirdi. Elnur və Junior çempionun arxa xəttinə problem yaradırdı. Lakin üç epizodda millimizin üzvü rusiyalı qolkiperi məyus edə bilmədi. Hissənin sonlarına doğru Juninyo dubl edə bilərdi. Lakin son anda Əli Səmədov buna mane oldu. 42-ci dəqiqədə “Kəpəz” yüzfaizlik qol şansını qaçırdı. Lunyovun uşaq səhvindən sonra Şakir topu ram edə bilmədi.

İlk hissədə göründü ki, “Qarabağ”ın müdafiəsində böyük problemlər var. Sadəcə, yeni transfer Silva özünü yaxşı tərəfdən göstərirdi. O əks-hücumların qurulmasında iştirak edirdi. Lunyov isə hələ əsas qapıçı olmağa hazır deyil.
Fasilədən sonra da gəncəlilər daha üstün oyun sərgiləyirdi. Azər Məmmədovun komandası rəqibi məyus etmək niyyətində idi. Düzdü, Qurban Qurbanovun rəhbərlik etdiyi kollektivin üzvləri fərdi cəhətdən “sarı-göylər”i üstələyirdi. Lakin oyun baxımından “Kəpəz” daha yaxşı idi. Təcrübəli mütəxəssis vəziyyəti düzəltmək üçün əsas heyət üzvlərindən beşini meydana buraxdı. Lakin Elvin, Julio, Yankoviç, Zubir və Leandro nəsə edə bilmədi. Əksinə, Azər Məmmədovun əvəzetmələri daha effektli oldu. Qonaqların çalışdırıcısı yeni transfer Vüsalı və gənc Cavadı meydana buraxdı. Bununla da oyunun axarı dəyişdi. Gəncəlilərin hücum potensialı artdı. Bunun nəticəsində 86-cı dəqiqədə hesab bərabərləşdi. Meydana daxil olan Vüsalın ötürməsini Cavad başla qapıya göndərdi.

Qoldan sonra Qurban Qurbanov xal itirməmək üçün bütün komandanı hücuma səslədi. Lakin bud a işə yaramadı. Qonaqlar qalan dəqiqələrdə yaxşı müdafiə olunmaqla hesabına 1 xal yazdıra bildi. Beləliklə, həftənin sensasiyası Suraxanıda yaşandı. “Kəpəz” çətin “Qarabağ” səfərindən xalla dönməyi bacardı.

Gözdən qaçmadı
Oyundan sonra insident baş verdi. Belə ki, ağdamlıların azyaşlı azarkeşinin futbolçularla şəkil çəkdirmək üçün meydana qaçdığını görən polis əməkdaşı uşağa badalaq atıb. Bu epizod “köhlər atlar”ın futbolçularını özündən çıxarıb. Bunu görən Luka Quqeşaşvili polisin üzərinə gedib. Daha sonra Toral Bayramov azarkeşə dəstək üçün futbolçularla birlikdə "İmarət Tayfa"nın önünə aparıb. Marko Yankoviç isə kiçik azarkeşə formasını hədiyyə edib. Bu vəziyyətə biganə qalmayanlarda biri də həmkarımız Mərdan Həsənov olub. O, stadionda mühafizə xidmətinin əməkdaşları ilə mübahisə edib. Hadisəylə bağlı həmkarımızla əlaqə saxladıq: