“Turan Tovuz” üçün bu oyunun heç bir önəmi olmasa da, qonaqlar üçün əhəmiyyəti böyük idi. Şahin Diniyevin çalışdırdığı kollektiv qərb zonasından 3 xalla dönəcəyi halda böyük ölçüdə premyer-liqada yerini qoruyacaqdı.

Ancaq oyun “dənizçilər” üçün heç də yaxşı başlamadı. Artıq 3-cü dəqiqədə Şəhriyar Əliyev Emil Balayevi topu tordan çıxarmağa məcbur etdi. Kapitan ardıcıl 3-cü korneri başla dəqiq tamamladı. Erkən qoldan sonra “dənizçilər” topa nəzarəti ələ keçirib, meydan sahiblərinin qapısına yaxınlaşmaq istəsələr də, heç nə alınmırdı. Bakılılar ən yaxşı halda cərimə meydançasının həndəvərinə yaxınlaşa bilirdi. Son ötürmə olmadığından meydan sahiblərinin müdafiəçiləri çətinlik çəkmədən hücumu zərərsizləşdirə bilirdi. Hesabda önə çıxan “boz qurd” bir qədər geri çəkilib oyunu əks-hücum üzərində qurmuşdu ki, bu da effekt verirdi. 20-ci dəqiqədə, növbəti hücumların birində “dənizçilər”i qoldan tir xilas etdi. İki dəqiqə sonra isə Ayxan qapıçının irəli çıxdığını görüb təxminən 25 metrdən iti bucaq altında topu boş qapıya göndərsə də, zərbəsi qeyri-dəqiq alındı.

Birinci hissənin qalan bölümü qarşılıqlı hücumlar şəraitində keçdi. Amma “Turan Tovuz”un həmlələri daha yaddaqalan olurdu. Komandanın ən məhsuldar oyunçusu Runi bu oyunda hücumçunun arxasında yer alsa da, standart vəziyyətlərdə təhlükəli olur, uzaqdan zərbələrlə Emilə çətin anlar yaşadırdı. Qonaqların heyətində isə Ağabala fəal idi. Ancaq onun təkbaşına cəhdləri komandasının qol vurması üçün yetərli olmurdu.

Birinci hissənin ilk dəqiqələrində olduğu kimi, ikinci yarının əvvəli də qonaqlar üçün düşərli olmadı. 49-cu dəqiqədə ilk qolun məhsuldar ötürməsini verən Ayxan qapıçı ilə üzbəüz qaldı və fürsətdən maksimum yararlandı. Artıq “dənizçilər” üçün itiriləsi heç nə qalmamışdı. Onlar matçı xilas etmək üçün böyük qüvvə ilə irəli atılmalıdıydı ki, məhz belə də oldu. Lakin tələskənlik, ötürmələrdə çoxsaylı səhvlər Diniyevin komandasına istədiyini reallaşdırmağa mane olurdu. Buna baxmayaraq, qonaqlar 73-cü dəqiqədə hesab arasındakı fərqi azalda bildi. Mazurek komandasını ümidləndirən qolun müəllifi oldu. Bakılılar bundan sonra təzyiqi bir qədər artırdı. Və bunun nəticəsi kimi əsas vaxta əlavə olunan 3-cü dəqiqədə hesab bərabərləşdi. Sonradan meydana çıxan Zakpa adını tabloya yazdırdı. Bəlkə də portuqaliyalının məhz bu qolu “dənizçilər”i elitada saxlayacaq…

Gözdən qaçmadı
* Hakimin start fitindən öncə stadionun diktorunun xəbərdarlığına baxmayaraq, yerli azarkeşlər tribunada pirotexniki vasitələr yandırdı.
* “Səbail”in fanatları oyuna gecikmişdi.“Dənizçilər”i dəstəkləyən, klubun bayrağı ilə “silahlanan” təxminən 20-25 azarkeş 20-ci dəqiqədə tribunada yerini tutdu. Onların sırasında zərif cinsin bir neçə nümayəndəsi də var idi.
* 25-ci dəqiqədə “Səbail” qol vursa da, baş hakim VAR-dan gələn siqnalı gözləməyi lazım bildi. Həmin an yerli azarkeşlər birağızdan “hakim, VAR-a bax” qışqırmağa başladı ki, Rəvan Həmzəzadə onların sözünə gülərək qarşılıq verdi. Ədalət təmsilçisi qolun ofsayddan vurulduğunu bildirincə, bir neçə saniyə əvvəl “VAR-a bax” qışqıranlar bu dəfə hakimin ünvanına alqış yağdırdı.
* 69-cu dəqiqədə əvəzetmədən oyuna qoşulan "Turan Tovuz”un legioneri Divine Naah 22 dəqiqə sonra zədələnərək xərəkdə meydanı tərk etdi. Çiynindən zədələnən qanalı futbolçunu təcili tibbi yardım maşını ilə dərhal xəstəxanaya apardılar.

RƏŞAD