Misli premyer-liqasında 7-ci turun görüşləri keçirilir.

"Kəpəz" "Şamaxı"nı məğlub edib - 2:1. Oyundan sonra qonaqların baş məşqçisi Vüqar Əsgərlinin mətbuat konfransı keçirilib. Sizi mütəxəssisin fikirləri ilə tanış edirik:

- Nəticədən başqa sizi narazı salan hansı məqamlar var?
- Bu matça qədər demək olar ki, komandanın oyunundan razı idik. Bu gün çoxlu top itkiləri baş verdi. Komandada zədəli oyunçular var. Həm də futbolçularımız gəncdi, bir-birinə uyğunlaşana kimi bizə vaxt lazımdı. Xallar itirsək də, bu reallıqdı ki, "Şamaxı" Azərbaycan futboluna Qurbanlar, Cəlallar, Fuadlar bəxş edəcək.

- Mövsümün sonunda bir komanda premyer-liqanı tərk edəcək. Bu gün "Kəpəz"ə məğlubiyyət sizin üçün həyəcan siqnalı ola bilər? Premyer-liqada qalmaq üçün legioner transferləri gözlənilir?
- Strategiya olaraq bunu seçmişdik ki, heyəti gənc futbolçulardan quraq. Birinci dövrə bitdikdən sonra çatışmayan mövqelərə legioner oyunçular cəlb edəcəyik. Premyer-liqanı tərk etmək istəmirik. Rəhbərlik bu uşaqların inkişafı üçün bizə şərait yaradıb. Premyer-liqada belə klubun olması çox önəmlidi. Çünki bəzi futbolçular kənarda qalır və karyeralarını tez bitirirlər. Legioner transferi gələcək planlarda var.

- Fasilə zamanı hansı planlarınız var?
- Bizim futbolçular da milli komandaların düşərgəsinə gedəcək. Çalışacağıq ki, bu fasilədən səmərəli istifadə edək. İndiyə kimi buraxdığımız qollar fərdi səhvlərdəndi. Bu da normaldı. Futbolçular gəncdir, həyəcan var. Buna baxmayaraq, baxımlı futbol oynayırıq. Bəzi məqamları çıxsaq, yaxşı kollektiv yarada bilmişik. Bunu daha da inkişaf etdirmək üçün vaxt lazımdı.