“Altyapı”sındakı gəncləri əlində saxlaya bilməyən və son dönəmlərdə öz yetirmələri ilə vidalaşmağa üstünlük verən “Qalatasaray” transfer dönəminin son günlərində qürbətçi gənclərə yönəlib.

“Football-plus.az” xəbər verir ki, İstanbul nəhəngi Almaniyada doğulan və “Bavariya”nın aşağı yaş qrupunda forma geyən Eyup Aydınla anlaşıb. Srağagün axşam İstanbula dəvət olunan istedadlı futbolçu ilə dünən müqavilə imzalanıb. Müqavilənin müddəti ilə bağlı hələ ki məlumat yoxdu. Digər detallara gəlincə, 19 yaşlı futbolçuya 50 min avro imza parası veriləcək. Onun illik maaşı 240 min avro təşkil edəcək. Bu məbləğ sonrakı illərdə artacaq. 181 sm boya malik 2004-cü il təvəllüdlü solaxay futbolçu yarımmüdafiənin mərkəzində çıxış edir və daha çox müdafiəyəmeyilli oynayır. Futbola “Haydenhaym”ın akademiyasında başlayan Aydın 2019-dan bəri “Bavariya”nın 2-ci komandasında çıxış edirdi. O, ötən mövsüm 24 oyunda hesabına 3 qol, 4 məhsuldar ötürmə yaza bilmişdi. Almaniya mətbuatının xəbərinə görə Eyup Aydına “Verder”, Münhenqladbax “Borussiya”sı, “Şalke-04” və hətta “Beşiktaş” da maraq göstərirdi.

“Qalatasaray” qürbətçilərdən tək bu futbolçu ilə kifayətlənməyərək Dortmund “Borussiya”sının yetirməsi olan Gökdəniz Gürpüz ilə də anlaşma əldə edib. 17 yaşlı yarımmüdafiəçi ilə üçillik müqavilə imzalanıb. Bu faktı “arılar”ın akademiyasının baş əlaqələndiricisi Lars Rikken də təsdiqləyib: “Gökdəniz Gürpüzün ayrılması bizim üçün üzücü xəbərdi. Amma futbolçunun ailəsi Türkiyədə yaşamağa üstünlük verdi. “Qalatasaray”la uzun müddətdi danışıq aparırıq və demək olar, bütün məsələlərdə razılıq əldə olunub”. İstedadı ilə adından söz etdirən və Türkiyənin U-17 yığmasında 5 oyuna 2 qol vuran bu futbolçu ötən mövsüm “Borussiya”nın 2-ci komandasında 28 qarşılaşmada 5 qol, 5 məhsuldar ötürməlik performans sərgiləmişdi. Qeyd edək ki, “Borussiya”nın yetirməsi olan Gökdənizin qardaşı Göktan da bu yay Türkiyəyə gələrək “Trabzonspor”la müqavilə imzalayıb. 20 yaşlı bu futboçu artıq superliqada qol hesabını açmağa da müvəffəq olub.

ƏLİ