I qrupunda 6-cı turun oyunlarında qeyri-adi nəticə qeydə alınmadı: imkanları yüksək dəyərləndirilən bütün komandalar qalib gəldi. Artıq bu qrupda ilk iki yer uğrunda mübarizənin İsveçrə, Rumıniya və İsrail yığmaları arasında gedəcəyini əminliklə proqnozlaşdırmaq olar.

"Football-plus.az" xəbər verir ki, sentyabrın 9-da Priştinada yerli Kosovo yığması ilə keçirilən oyunda (2:2) qələbəni son saniyələrdə əldən verən İsveçrə millisinin Andorra ilə matçda xal itirməyə haqqı yox idi. Qrupun lideri autsayderlə Elçin Məsiyevin idarə etdiyi ev oyununda hər baxımdan üstün olsa da, qapıya yol tapmaqda çətinlik çəkdi. Səbəb Murat Yakının komandasının qapıya endirdiyi 21 zərbədən yalnız üçünün “çərçivə”yə düşməsi ilə bağlıdı. Maraqlıdı ki, fasilədən sonraya təsadüf edən hər üç zərbə qolla nəticələndi. Bu qələbə mərkəzi avropalılara liderliyi davam etdirmək imkanı verdi.
Buxarestdəki oyun da ev sahiblərinin qələbəsi ilə nəticələndi. “Arena Natsionale” stadionundakı matç daha çox insidentlə yadda qaldı. Rumıiyalı fanatların tribunalarda “Kosovo Serbiyadı” və “Bessarabiya Rumıniyadı” yazılan bannerlərdən istifadə etməsi qonaq komandanın etirazına səbəb oldu. İlk hissədə kosovolu futbolçuların meydanı tərk etməsi matçda təxminən 50 dəqiqəlik fasilənin yaranmasına səbəb oldu. Mübarizə bərpa olunandan sonra, ikinci hissədə Muriqi növbəti xəbərdarlığa görə kosovoluları meydanda azlıqda qoydu. Ev sahibləri təşəbbüsü tam ələ alaraq penalti vurmaq hüququ qazandılar. Qapıçı Muriç Stançunun zərbəsini dəf etsə də, rumıniyalı futbolçu 83-cü dəqiqədə səhvini düzəldərək hesabı açdı. Final fiti ərəfəsində daha bir qol vuran Rumıniya yığması vacib qələbə ilə 2-ci yerdəki mövqeyini qorudu. Kosovo isə praktiki cəhətdən bu yerə belə iddiasına böyük ölçüdə “kölgə saldı”.

İsrail üçün Belarus yığmasına qarşı ev oyunu çətin alındı. Ev sahibləri əksər statistik göstəricilər üzrə rəqibini üstələsələr də, qapıya yol tapmaqda çətinlik çəkirdilər. Bunda qapıçı Plotnikovun inamlı oyunu da rol oynayırdı. Amma onun həmkarı Qlazer də işsiz qalmırdı. İsrailli qapıçı Boçerovla Peçeninin zərbələrini dəf etdi. Fasilədən sonra fəallaşan Alon Hazanın komandası istəyinə son anda çatdı. Meydana 2-ci hissədə çıxan Kanixovskinin vurduğu qol İsrail yığmasının liderlər qrupundakı mövqeyini qorumasını təmin etdi. Baş məşqçi vəzifəsində Andora ilə debüt matçı qolsuz nəticələn Karlos Alos Belarus millisi ilə ilk məğlubiyyətini aldı.

I qrupu
İsveçrə - Andorra 3:0 (0:0)
İsveçrə: Mvoqo, Rodriges, Elvedi, Akanci, Şakiri (Eybişer, 90+4), Caka, Fröyler (Sou, 66), Şteffen, Varqas (Bislimi, 90+4), İtten (Okafor, 81), Amduni (Ndoye, 66).
Andorra: İ.Alvares, Lima (Kuku, 23), M.Vales (Vieyra, 76), M.San Nikolas, Qarsiya, Lyovera, Servos (İ.Fernandes, 88), Alavedra, Gilyen, Rebes, E.Vales (Alaes, 76).
Qollar: İtten, 49 (1:0). Caka, 84 (2:0). Şakiri, 90+3-p. (3:0).
Vərəqələr: Fröyler, 22. E.Vales, 68. Gilyen, 69. Akanci, 69. Zommer, 69 (meydandan kənarda) - sarı.
Hakim: Elçin Məsiyev (Azərbaycan).
12 sentyabr. Syon. 9000 tamaşaçı.
Rumıniya – Kosovo 2:0 (0:0)
Rumıniya: Moldovan, Rarsu, Burke (R.Marin, 63), Drequşin, Haci (Morutsan, 72), Banku, Stançu, Çikıldeu (Olaru, 77), Skreçu, Puşkaş (Alibek, 46), Koman (Miheyle, 71).
Kosovo: Muriç, Voyvoda (Beka, 81), Aliti, Pakyarada, Amir Rrahmani, Jeqrova (Dreşeviç, 64), V.Berişa (Musliya, 54), B.Berişa (Albion Rrahmani, 82), Raşitsa (Haderconay, 54), Loşay, Muriki.
Qollar: Stançu, 83 (1:0). Miheyle, 90+3 (2:0).
Stançu 61-ci dəqiqədə penaltidən yararlana bilməyib (qapıçı).
Vərəqələr: Burke, 9. B.Berişa, 14. Puşkaş, 33. Amir Rrahmani, 33. Banku, 52. Voyvoda, 52. Loşay, 58. Bekay, 90+6 (meydandan kənarda) - sarı. Muriki, 42 – qırmızı (ikinci sarı).
Hakim: Villi Delajo (Fransa).
12 sentyabr. Buxarest. 29982 tamaşaçı.
İsrail – Belarus 1:0 (0:0)
İsrail: Qlazer, Vitor, Dasa (Baribo, 78), Lemkin, Revivo, Dor Perets (Kanixovski, 64), Yehezkel (Abu Fani, 64), Lavi (Safuri, 72), Qlux, Vayssman (Turqeman, 64), Solomon.
Belarus: Plotnikov, Politeviç, Polyakov, Volkov, Karpoviç (Bıkov, 80), Peçenin (Malkeviç, 59), Kaplenko, Korzun (Kovalyov, 80), Boçerov (Selyava, 59), Morozov, Kontsevoy (Savitski, 68).
Qol: Kanixovski, 90+3.
Vərəqələr: Dor Perets, 56. Turqeman, 89. Savitski, 90+7. Volkov, 90+8 - sarı.
Hakim: Rikardo Benqoeçea (İspaniya).
12 sentyabr. Təl-Əviv. 28435 tamaşaçı.
1. İsveçrə 6 4 2 0 17-5 14
2. Rumıniya 6 3 3 0 9-4 12
3. İsrail 6 3 2 1 7-7 11
4. Belarus 6 1 1 4 4-11 4
5. Kosovo 6 0 4 2 5-8 4
6. Andorra 6 0 2 4 3-10 2
12 oktyabr: İsrail - İsveçrə, Belarus – Rumıniya, Andorra - Kosovo.