“Rumıniya çempionatının ən güclü komandası “Yunayted Qalati”di. Bildiyimə görə, onlardan 5 futzalçı dəvət edilib. Hər biri çox təhlükəli oyunçudu. Xüsusilə Daniel Araujo... Burda braziliyalılara xüsusi önəm verirlər. Uzunmüddətli seçimlərdən sonra kimsə heyətə qatılır, ya yox. İstvan Hadnagy isə “Odorheiu Secuiesc”in ulduzlarındandı. Yüz faiz deyə bilərəm ki, Rumıniya futzalı çox inkişaf edib. Əvvəllər rumınları rahatlıqla məğlub etmək mümkün idi. Son illərdə güclü rəqiblər üzərində xeyli qələbə qazanıblar. İkinci güclü komanda isə “Deva”dı. Yaxşı ki, o klubdan cəmi bir nəfər çağrılıb. Azərbaycan millisinin son durumu haqda geniş məlumatım yoxdu. Lakin mövzuyla bağlı əlaqə saxladığım şəxslər düşünür ki, Rumıniya məğlub olacaq. Yenə deyim ki, rəqibin heyətində güclü futzalçılar var. Sözün açığı, millimizin yerli oyunçularının burda nəsə edə biləcəyi sirlidi. Məncə, qələbə üçün meydana çox yaxşı legionerlər çıxmalıdı. Bəxtsizlikdən matçın keçirələcəyi arenanın vəziyyəti də çox pisdi. Bu haqda Rumıniya Futzal Federasiyasına xəbərdarlıq etmişəm. Şərait yox dərəcəsindədi. Adətən, belə beynəlxalq oyunlar Buxarestdə yerləşən, müasir standartlara cavab verən arenada keçirilirdi. Bu dəfə vəziyyət fərqlidi. Qarşılaşmanın reklamına da fikir verilmir. Start fitinə saatlar qalmasına baxmayaraq, şəhərdə ab-hava yaxşı deyil. Deyərdim ki, çoxu matçın keçiriləcəyindən xəbərsizdi. Oyuna ciddi hazırlaşmırlarsa, güclü heyət nəyə lazım idi? Belə məqamlar maraqlıdı. Buzau şəhərində azarkeşlərin stadiona gəlməsi də gözlənilmir. Çox güman, az sayda tərəfdar gələr”.