"Rumıniya güclüdü, Niderland isə hər matçda sürpriz edə bilər" - Amadeu
“Rumıniyadakı zal istənilən səviyyədə deyil”.
“Football-plus.az” xəbər verir ki, bunu millimizin futzalçısı Amadeu DÇ-2024-ün elit mərhələsində Rumıniya ilə keçiriləcək səfər oyunu ərəfəsində Futzal Federasiyasının mətbuat xidmətinə açıqlamasında deyib.
Braziliyaəsilli müdafiəçi görüşün baş tutacağı məkanda keçirdikləri ilk məşqdə müəyyən çətinliklərlə üzləşdiklərini söyləyib:
“Yol yorğunluğuna baxmayaraq, Rumıniyadakı ilk məşqimiz normal alındı. Baş məşqçinin tapşırıqlarını yerinə yetirməyə çalışdıq. Ancaq bizdən əvvəl həndbolçular məşq etdiyi üçün zalda örtük yapışqan idi. Ümid edirəm ki, növbəti məşqə qədər təmizləyərlər”.
Amadeu ilk turda qalibiyyətin böyük önəm kəsb etdiyini bildirib:
“Hər kəs qələbə haqqında düşünür. Uğurlu başlanğıc növbəti oyunlarda daha yaxşı nəticə qazanmağımız üçün vacibdi. Daha bir məşqimiz olacaq. Bütün gücümüzü səfərbər edərək, bura qədər çəkdiyimiz əziyyətin bəhrəsini görmək istəyirik. Çünki Rumıniya ilə matçdan sonra Bakıda Niderlandla görüşəcəyik. Həmin oyuna qalib əhvalda çıxmaq lazımdı”.
O, Rumıniyanın güclü heyətə malik olduğunu düşünür:
“Onların 2 oyunlarına baxmışam. Heyətlərində Braziliyaəsilli 4 futzalçı var. Çox çətin qarşılaşma olacaq. Şansları qaçırmaq olmaz. Elə matçdı ki, həmin gün kim yaxşı köklənsə, imkanları düzgün dəyərləndirsə, qələbə qazanacaq”.
Amadeu qrupdakı şansları barədə də fikirlərini bölüşüb:
“Rumıniya güclü rəqiblərdəndi. Niderland isə hər matçda sürpriz edəcək gücdədi. Son illər inkişafdadı, heyətlərində fərdi qabiliyyətinə görə seçilən oyunçular var. Təkbətək mübarizələrdə güclüdülər. Qazaxıstan yığması haqqında isə ətraflı danışmağa dəyməz. Onlar son illər böyük yarışların final mərhələsində oynamağa adət ediblər. Qrup birincisi olmaq baxımından komandamızın şansı 50/50-yədi”.
Qeyd edək ki, sabah Buzau şəhərindəki “Romeo lamandi” zalında keçiriləcək Rumıniya – Azərbaycan oyunu Bakı vaxtı ilə saat 19.30-da start götürəcək.
Digər xəbərlər
