AFFA İcraiyyə Komitəsinin dünən keçirilən iclasında futzal yığmasının baş məşqçisinin adı məlum oldu. Komandanı qarşıdakı 1 ildə Vitali Borisov çalışdıracaq.

"Football-plus.az" xəbər verir ki, bir müddət əvvəl “Araz-Naxçıvan”a baş məşqçi kimi təyinat alan Borisov bu dəfə millinin çalışdırıcısı kimi federasiyanın saytına müsahibə verib.

- Növbəti təyinatınız münasibəti ilə təbrik edirik. Ardıcıl ikinci təyinat nə dərəcədə gözlənilən oldu?
- Təbrikə görə təşəkkür edirəm. Həqiqətən də gözlənilməz oldu. Əlbəttə, milli komandada həm oynamaq, həm də işləmək fəxrdi. Hər bir idmançının arzusudu ki, təmsil etdiyi idman növündə ölkəsinin adını ucaltsın. Biz də bu fürsəti düzgün dəyərləndirməyə çalışacağıq.

- Həm millinin, həm də “Araz-Naxçıvan”ın baş məşqçisi kimi iki cəbhədə çalışmaq çətin olmayacaq?
- Razıyam, hər iki istiqamətdə çalışmaq çətindi. “Araz-Naxçıvan” tək daxili çempionatda deyil, Çempionlar Liqasında da uğur qazanmaq üçün mübarizə aparacaq. Digər tərəfdən, bu klub millinin də bazası hesab olunur. Deməli, yığma ilə bağlı işimizin bir hissəsini klubda görəcəyik. Millinin də tapşırığı var. Çalışacağıq ki, hər iki cəbhədə yaxşı nəticələr qazanaq.

- Millidə köməkçi məşqçilər kimlər olacaq?
- “Araz-Naxçıvan”dakı heyətlə birgə çalışacağıq. Serb mütəxəssislər - Predraq Rayiç və Zoran Rakiçeviç köməkçilərim olacaq. Zoran qapıçılarla işləyəcək.

- Artıq millinin elit-raunddakı rəqibləri müəyyənləşib. A qrupu haqda düşüncələrinizi bilmək istərdik...
- Bu mərhələdə zəif rəqib olmur. Elit-raunda qədər 2 mərhələ keçirilib və güclülər son raunda qalıb. Niderland və Rumıniya yığmaları reytinq cədvəlində bizdən aşağı pillələrdə yer alsalar da, döyüşkən kollektivdilər. Qazaxıstanın isə xüsusi təqdimata ehtiyacı yoxdu. Bu komanda son 2 dünya çempionatının final mərhələsində iştirak edib. Onlar dünyanın ən güclülərindən biridilər.

- Artıq təqvim də müəyyənləşib. Səfərdə başlayıb, rəqib meydanında da yekunlaşdıracağıq. Bunun planlarınıza hansısa şəkildə təsiri olacaq?
- Harda başlayıb, harda bitirmək böyük rol oynamır. Əsas məqam komandanın hazır olması, futzalçıların zədə və ya hansısa səbəbdən komandaya kömək edə bilməməsidi.

- Şansları necə qiymətləndirirsiz?
- Hazırkı məqamda komandaların hamısının şansı bərabərdi.

RƏŞAD